Themelohen dy Komisione Hetimore Parlamentare për Energjinë 

Art i të pamundurës rezulton të jetë politika kosovare. Bllokuan për shumë kohë parlamentin sepse nuk ishin dakord për krijimin e një Komisioni Hetimor Parlamentar për Energjinë Elektrike por sot ranë dakord për krijimin e dy komisioneve të këtij lloji, njërin të propozuar nga PDK dhe tjetrin nga Lëvizja Vetëvendosje.

Pas votimit për krijimin e Komisionit Hetimor Parlamentar për Energjinë, proceduan edhe me propozimin për votimin e anëtarëve të tij. Kështu, nga LVV u propozuan Armend Muja, Haki  Abazi, Arber  Rexhaj e Halil Thaçi; Nga PDK u propozuan Hajdar Beqa e Rashit Qalaj; Nga LDK, Armend Zemaj e Rrezarta Krasniqi; Nga AAK u propozua deputetja Time Kadriaj; Nga komunitetet jo shumicë, Duda Balje ndërsa nga Lista Srpska u propozua deputeti  Lubinko Karadziç.

Si për Komisionin ashtu dhe përbërjen e Komisionit Hetimor Parlamentar për Energjinë, votuan për, të gjithë deputetët e pranishëm në seancë ndërsa Ushtruesja e detyrës së shefes së Grupit Parlamentar të LVV-së, Mimoza Kusari tha se afati kohor i këtij komisioni hetimor parlamentar do të jetë prej vitit 2006.

Ndërkohë 92 deputetë i dhanë dritën jeshile edhe formimit të Komisionit Hetimor për Energjinë të porpozuar nga opozita. Komisioni hetimor do të drejtohet nga deputet i LDK-së, Driton Selmanaj. Anëtarë Artan Abrashi, Enver Haliti, Jeta Statovci dhe Mimoza Kusari-Lila nga LVV; Nga PDK do të jenë Ferat Shala dhe Eliza Hoxha; Nga LDK, Besian Musatafa; Nga AAK, Pal Lekaj ndërsa nga komunitetet jo shumicë, Adem Hoxha dhe Fridon Lala.