Themelore për demokracinë, Yuri Kim: Qytetarët të votojnë pa frikë!

Duke sjellë në vëmendje Rekomandimin Nr.4 të Raportit të OSBE-ODIHR për zgjedhjet e 25 Prillit, Ambasadorja e SHBA në Tiranë, Yuri Kim, nxitë autoritetet të veprojnë sepse është themelore për demokracinë që qytetarët të votojnë pa frikë.

“Ne i nxisim autoritetet të veprojnë sipas këtij dhe rekomandimeve të tjera të @osce_odihr në lidhje me zgjedhjet e 25 prillit. E drejta e qytetarëve për të votuar lirshëm – pa frikë ose presion ose joshje të paligjshme – është themelore për demokracinë,” thekson Ambasadorja Yuri Kim në reagimin e saj përmes rrjetit social Twitter duke e shoqëruar me mesazhin e kreut të KQZ-së, Ilirjan Celibashi.

Ndryshe, Rekomandimi Nr. 4 i Raportit përfundimtar të Misionit të kufizuar të ODIHR për vëzhgimin e zgjedhjeve parlamentare të 25 Prillit 2021, që i kushtohet përdorimit të dhënave të qytetarëve nga patronazhistët thotë: “Shqipëria duhet të garantojë sigurinë e të dhënave personale të qytetarëve. Institucionet përkatëse duhet të hetojnë dhe sanksionojnë plotësisht çdo shkelje që ndikon në besimin e publikut në procesin zgjedhor.”