“Thirrja e Edi Ramës për opozitën”, PD: Fallco, për të mbuluar dështimin e tij!

Pasi shprehu keqardhje që në vend të bashkimit në këtë luftë kundër COVID-19, ku duhet mbrojtur jeta e çdo njeriu, opozita nuk i uli armët e luftës, Edi Rama bëri thirrje të bashkojë forcat për të mbrojtur çdo jetë shqiptari, thirrje të cilën Partia Demokratike duke reaguar përmes Sekretarit të Përgjithshëm, Gazment Bardhi e konsideron fallco me qëllim të mbulimit të dështimit të tij.

“Edi Rama kërkon të fshihet pas thirrjeve fallco për bashkëpunim me opozitën për të mbuluar dështimin e tij. Ai ka refuzuar që në fillim bashkëpunimin dhe ndihmën konstruktive të opozitës. Madje ka harxhuar energji dhe orë të tëra duke sulmuar opozitën me batuta ordinere dhe bajate, në vend që të fokusohet tek emergjenca,” thekson Sekretari i Përgjithshëm i PD, Gazment Bardhi duke përfunduar:

“Ftesat janë fallco dhe bëhen vetëm për të mbuluar dështimin e tij, që këtë radhë është edhe më i madh dhe i dëmshëm se më parë.”

Ndryshe, sot duke prezantuar Paktën e Zgjeruar të ndihmës ekonomike, Kryeministri Edi Rama akuzoi opozitën dhe liderin e saj Lulzim Basha, pasi sipas tij, i kishte kërkuar të bashkojë forcat me të dhe të bashkojë ekspertët në dispozicion qoftë për të rrezistuar aty ku është vija e zjarrit qoftë për ekonominë, epërgjigja ishte, akuza ndaj atyre në vijën e zjarrit, qoftë me recetat imagjinare ekonomike.

“Jam i keqardhur që në vend të bashkimit në këtë luftë ku duhet mbrojtur jeta e çdo njeriu ata nuk i kanë ulur armët e luftës, por kurrë nuk është vonë,” tha Kryeministri Edi Rama duke shtuar:

“Thirrja ime është të bashkojmë forcat, të diskutojmë hapat, të ballafaqojmë sy më sy vendimet që marrim dhe cilësinë e ekzekutimt të tyre, të flasim me një zë për të mbrojtur çdo jetë shqiptari që nga Shkodra ku e kujtojnë COVID si virusi komunsit dhe deri në Vlorë ku e kujtojnë si opozitë dhe qeshin, të dalim bashkë si popull faqebardhë nga kjo luftë.”