Thirrje, Edi Rama: Komisioni për shkarkimin e Metës, ta konsiderojë shumë seriozisht…

Ndërkohë që Parlamenti po diskutonte në një seancë të jashtëzakonshme rreth një Projektrezolute pas situatës së krijuar të një kandidature për anëtar të Gjykatës Kushtetuese tashmë me dy anëtarë, atë nga Parlamenti që u betua tek një Noter dhe kandidates së Presidentit që u dekretua dhe betua në Presidencë, Ilir Meta kërcënoi edhe me shpërbërjen e parlamentit, që mori dhe përgjigjen flakë për flakë nga partneri i tij i koalicionit të qelbësirave, kryeministri Edi Rama. Duke e akuzuar Metën për situatën e turpshme që e ka sjellë vendin përballë partnerëve strategjikë e të palëkundur të Shqipërisë, SHBA dhe BE, ndërkohë që Presidencën e ka kthyer në një frengji, prej nga sulmon nga të katër anët, Edi Rama tha se nuk  ja vlen të humbet më shumë kohë për komentimin e marrëzive të Metës ndërsa i bëri thirrje Komisionit Hetimor Parlamentar për shkarkimin e Presidenti të Republikës, ta konsiderojë seriozisht këtë çështje dhe të shkojnë të votojnë për neutralizimin e akteve antikushtetuese të presidentit.

“Edhe njëherë tjetër përplasja është jo mes nesh dhe Ilir Metës, por mes Metës dhe drejtësisë. Edhe njëherë tjetër për këdo që do të kuptojë pa hyrë në të thella, jemi përballë si Kuvendi me njeriun që e ka humbur busullën dhe e ka kthyer institucionin e Presidentit në një frëngji prej ku sulmon nga të katër anët, duke qenë ne këtu, 100% jo 99% në të njëjtën linjë me SHBA, BE. Dhe pastaj është e lehtë të kuptohet pse si çdo herë tjetër Meta nuk kursen as partnerët strategjikë dhe as dy aleatët e mëdhenj të palëkundur dhe të pandryshueshëm të Shqipërisë, SHBA dhe BE, duke na vënë të gjithëve në një pozitë jokomode për të thënë më të paktën dhe të turpshme për ta thënë me të gjitha fjalët deri në fund. Sepse insinuon haptas se këto përfaqësi të nderuara të shteteve që janë që në ditën e parë të procesit të Reformës në Drejtësi promotore dhe mbështetëse të kësaj reformë akuzohen si të korruptuara,” tha Edi Rama duke paralajmëruar shkarkimin e Ilir Metës me vendimin që duhet të marr Komisioni Hetimor me po këtë dedikim:

“Për këtë arsye, ky Kuvend duhet të marrë masa ligjore për të krijuar të gjithë mekanizmat zhbllokues ndaj çdo akti flagrant e brutal të atij që zyrën e presidentit e ka kthyer në një frëngji për të shantazhuar parlamentin, ndërkombëtarët, popullin shqiptar. Besoj se Komisioni për Shkarkimin e Metës duhet ta konsiderojë shumë seriozisht edhe paketën e rekomandimeve për Kuvendin, ashtu sikundër në dritën e kësaj ngjarjeje të re Komisioni i Ligjeve dhe gjithë deputetët duhet të kontribuojnë për të ardhur këtu në Kuvend dhe për të votuar neutralizimin e akteve antikushtetuese të presidentit.”

Faktin, Ilri Meta President, kryeministri Edi Rama e quan taksirat që i ka rënë shqiptarëve ndërsa për situatën e krijuar ai thekson se Metës i ka humbur busulla dhe është e pakuptimtë komentohen veprimet e tij ligjore.

“Nuk ka interpretime të mundshme në këtë proces. është njësoj si të mblidhemi në këtë Kuvend dhe të bëjmë interpretime të Gjykatës Kushtetuese. Të gjithë kanë të drejtë të bëjnë interpretime, por nuk ka askush të drejtë që ti përdorë ato për të kundërsulmuar dhe për të mos u bindur institucioneve të drejtësisë. Të tjerat janë “dokrra hini” siç thoshte Fishta. Kush jemi ne që mund të vendosim ndryshe nga çfarë kanë vendosur institucionet e Drejtësisë dhe në këtë rast Këshillin e Emërimeve në Drejtësi. Nuk ja vlen të humbasim më shumë kohë të komentojmë marrëzitë e Metës. Na ka rënë ky taksirat ne, shqiptarëve dhe do bashkëjetojmë me këtë taksirat për aq kohë sa Institucioni i Presidencës do të jetë tokë e xanun nga dikush që ka humbur busullën,” tha Edi Rama për të cilin Ilir Meta është si talebanët:  “Meta ka luftë me botën, Europën, qeverinë dhe me veten. Në kemi detyrë që të shmangim aktet negative të kësaj lufte, ku ky njeri ka marrë përsipër të jetë interpreturesi i vetëm i Republikës së Shqipërisë, njësoj si talebanët e që e quajnë veten interpretuesin e vetëm të librit fuqiplotë.”