Thirrje, Erdogan: Armëpushim të menjëhershëm në Ukrainë
Presidenti i Turqisë, Recep Tayyip Erdogan, tha se bisedimet midis negociatorëve rusë dhe ukrainas sot në Stamboll, mund të hapin rrugë për takimin e liderëve të Ukrainës dhe Rusisë.
Duke folur para negociatorëve, Erdogan tha se është koha që bisedimet të japin rezultate konkrete dhe bëri thirrje për armëpushim të menjëhershëm, duke shtuar se ndalja e kësaj tragjedie varet nga të dy palët.
Erdogan tha se si presidenti ukrainas, Volodymyr Zelensky, ashtu edhe ai rus, Vladimir Putin, ishin miq të çmuar.
Presidenti turk tha se Ukraina dhe Rusia kanë shqetësime legjitime, por shtoi se ka ardhur koha që bisedimet të japin rezultate konkrete.
“Në një moment kaq kritik, ne jemi të kënaqur që t’iu mirëpresim dhe të kontribuojmë në përpjekjet e juaja për të vendosur paqe. Shpresoj që takimi ynë dhe diskutimet tona të shkojnë në favor të shteteve tuaja, të rajonit tonë dhe të gjithë njerëzimit”, u shpreh Erdogan duke theksuar se paqja e drejtë nuk ka humbës dhe se vazhdimi i konfliktit nuk i shkon përshtati askujt.
Ndryshe, ky është takimi i dytë që mbahet në Turqi, raporton RFE, pasi në fillim të marsit, kryediplomatët ukrainas dhe rusë u takuan në Antali, por takimi i tyre përfundoi pa ndonjë rezultat konkret.
Palët kanë mbajtur edhe takime në Bjellorusi dhe përmes platformave online, takime që kanë për qëllim t’i japin fund pushtimit të paprovokuar rus të Ukrainës, që nisi më 24 shkurt.
Ndërkohë Ministri e Mbrojtjes së Mbretërisë së Bashkuar tha se forcat ukrainase kanë kryer kundërsulme të lokalizuara në veriperëndim të Kievit, të cilat kanë rezultuar me njëfarë suksesi, duke zmbrapsur rusët nga një sërë pozicionesh.
Në informacionet e përditësuara lidhur me luftën në Ukrainë, raporton RFE, Mbretëria e Bashkuar paralajmëroi se forcat ruse ende paraqesin rrezik të madh për kryeqytetin ukrainas, Kiev, për shkak të aftësive të tyre për të kryer sulme ajrore.
Në jug të Ukrainës, sipas Ministrisë britanike të Mbrojtjes, Rusia ka vazhduar ofensivën në Mariupol, duke kryer granatime, por tha se forcat ukrainase ende kanë nën kontroll qendrën e qytetit.
Në pjesë të tjera të Ukrainës, forcat ruse, po mbajnë pozicionet bllokuese, teksa po tentojnë të riorganizohen dhe të rivendosin forcat e tyre, tha Ministria e Mbrojtjes së Mbretërisë së Bashkuar.
