Thirrje, Josep Borrell: Ulje të menjëhershme të tensioneve në veri të Kosovës

Përfaqësuesi i Lartë për Politikë të Jashtme dhe Sigrui pranë BE, Josep Borrell, ka kërkuar nga Kosova dhe Serbia të ulin tensionet pas vendosjes së reciprocitetit të targave nga Qeveria e Kosovës.

“Bashkimi Evropian bën thirrje për ulje menjëhershme të tensioneve në veri të Kosovës. Çdo provokim ose veprim i njëanshëm duhet të shmanget pasi që ato do të shkonin direkt kundër interesave të njerëzve në rajon”, thuhet në njoftimin e Zyrës së Borrellit ku rikujtohet se Prishtina dhe Beogradi duhet të zbatojnë secilin obligim të nxjerrë nga dialogu i Brukselit.

“Ne i bëjmë thirrje lidershipeve në Beograd dhe Prishtinë të marrin pozicione të përgjegjshme dhe të punojnë përmes dialogut të lehtësuar nga BE-ja për shmangjen e ndonjë përshkallëzimi të mëtejshëm, për të rivendosur një atmosferë paqësore dhe për të punuar për një zgjidhje të zbatueshme.”

Në interesin e të gjithëve, thekson Zyra e Përfaqësuesit të Lartë, duhet të kërkohet një rrugë përpara që mundëson lirinë e lëvizjes dhe që përmirëson jetën e përditshme të njerëzve ndërsa përfundon:

“BE dhe shtetet anëtare i bëjnë thirrje Kosovës dhe Serbisë që të respektojnë dhe zbatojnë plotësisht të gjitha obligimet e tyre të dala nga dialogu pa asnjë vonesë të mëtejshme.”

Ndryshe, Qeveria e Kosovës ka marrë vendim më 20 Shtator që automjetet nga Serbia, me të hyrë në Kosovë duhet të pajisen me targa të përkohshme, duke vendosur kështu masën e reciprocitetit për targat e Serbisë, pasi një gjë të ngjashme shteti serb e ka aplikuar për automjetet nga Kosova për më shumë se 10 vjet.