Thirrje KQZ-së, PD: Mos e regjistroni Tom Doshin në zgjedhjet e 25 Prillit

Partia Demokratike i ka bërë thirrje sot Komisionit Qendror të Zgjedhjeve, KQZ, që të mos e regjistrojë Tom Doshin në zgjedhjet e 25 Prillit.

Duke e konsideruar Tom Doshin si subjekt të ligjit të dekriminalizimit, Partia Demokratike thekson se ai nuk mund të marrë pjesë në zgjedhje.

“Në kuptimin e ligjit të dekriminalizimit, neni 2, Tom Doshi ndalohet të kandidojë, pasi ai është i dëbuar nga Shtetet e Bashkuara të Amerikës. Urdhri i Sekretarit Amerikan të Shtetit ia ndalon atij hyrjen në SHBA, duke përbërë shkak ligjor për ndalimin e kandidimit të Tom Doshit në zgjedhjet e 25 Prillit 2021,” thekson Partia Demokratike përmes një deklarate duke i bërë thirrje KQZ të zbatojë ligjin dhe të marrë këtë vendim, në interesin më të mirë të vendit dhe qytetarëve shqiptarë.

Ndryshe, pavarësisht apelit të ambasadores së SHBA në Tiranë Yuri Kim, e cila e përmendi me emër, duke kërkuar moskandidimin e tij, Tom Doshi ka dorëzuar zyrtarisht në KQZ listën e kandidatëve të PSD për zgjedhjet e 25 Prillit ku si kryetar përveç Qarkut Shkodër ka kandiduar edhe në Qarkun Tiranë.