Thirrje Serbisë, Borrell: Tërhiq ushtrinë nga kufiri me Kosovën!
Përfaqësuesi i lartë për Politikë të Jashtme dhe Siguri në BE, Josep Borrell, më në fund hoqi maskën dhe i bëri thirrje sot Serbisë ta ndalë menjëherë zhvendosjen e ushtrisë përgjatë kufirit me Kosovën dhe t’i tërheqë trupat e vendosur deri tani.
“Në të njëjtën kohë grumbullimi ushtarak i Serbisë në afërsi të vijës kufitare është shumë shqetësues. Kjo duhet të ndalet menjëherë,” tha Borrell pas zhvendosja trupave serbe përgjatë kufirit me Kosovën rreth një javë pas sulmit të 24 shtatorit ndaj Policisë së Kosovës në Banjskë të Zveçanit, ku mbeti i vrarë një zyrtar policor, dhe një ditë pasi po këtë thirrje e bëri Sekretari amerikan i Shtetit Antony Blinken, duke shtuar:
“Nuk ka vend për grumbullim të ushtrisë dhe forcave të sigurisë në kontinentin e Evropës. Forcat duhet të tërhiqen.“
Shefi i diplomacisë evropian tha se BE është duke diskutuar me partnerët dhe aleatët e vet për gjendjen e tanishme veri të Kosovës, ku sasia e armatimit të gjetur nga Policia e Kosovës është shumë serioze. Dhe, një ditë pasi përgjegjësinë për organizimin e sulmit e mori krimineli Milan Radoiçiç i cili si Nënkryetar i Listës Srpska drejton partinë më të madhe të serbëve në Kosovë, Borrell pret që përgjegjësit për sulmin e 24 shtatorit të ndëshkohen dhe Kosova dhe Serbia t’i kthehen dialogut.
“Duhet të kthehemi prapa në situatën në të cilën palët bisedojnë dhe të kthehemi në dialogun e lehtësuar nga BE-ja i cili është e vetmja platformë për normalizimin e raporteve mes tyre!“
Ndryshe, edhe sot Beogradi zyrtar përmes propapandës serbomadhe ka vazhduar të bind opnionin serb dhe atë ndërkombëtar se në kufi me Kosovën ka shumë më pak forcaa ushtarake se kohë më parë ndërsa Presidenti Aleksandar Vuçiç tha se nuk ka dekretuar nivel të gatishmërisë luftarake për Ushtrinë e Serbisë.
