Thirrje, Varhelyi: Një Kosovë pa viza!

 Komisioneri i Bashkimit Evropian për Fqinjësinë dhe Zgjerimin, Oliver Varhelyi, duke folur në takimin e radhës të Komisionit për Çështje Politike dhe Demokraci të Asamblesë Parlamentare të Këshillit të Evropës, i cili u mbajt në Budapest të Hungarisë për pakon e zgjerimit të Komisionit të BE-së 2021, bëri thirrje për një Kosovë pa viza.

“Siç mund ta dini, raportet e këtij viti përputhen plotësisht me metodologjinë e rishikuar të zgjerimit, të miratuar vitin e kaluar nga Komisioni, si dhe katër parimet kryesore të tij: më shumë besueshmëri, më shumë parashikueshmëri, më shumë dinamizëm dhe drejtim politik më të fortë,” tha Varhelyi duke konstatuar se në raportet e këtij viti shihet se BE ka një axhendë të njëjtë me Këshillin e Evropës sa i përket çështjes së reformave në Ballkanin Perëndimor ndërsa veçoi edhe disa nga çështjet kryesore dhe hapat që i presin vendet e Ballkanit Perëndimor.

Sa i përket Kosovës, ai tha se duhet të vazhdohet me procesin e liberalizimit të vizave për qytetarët e saj, duke bërë kështu thirrje për një Kosovë pa viza.

Lidhur me dialogun, ai tha se duhet të vazhdojë dhe të përfundojë me sukses, për normalizimin e plotë të marrëdhënieve.

Në vazhdim, komisioneri i BE-se tha se vendet e Ballkanit Perëndimor sfidë kryesore e kanë luftimin e korrupsionit dhe krimit të organizuar.

Gjatë takimit të Komitetit për Çështje Politike dhe Demokraci, fjalën e mori edhe drejtuesja e delegacionit të Kosovës, Saranda Bogujevci.

Në fjalën e saj Bogujevci fillimisht rikujtoi adresimin e saj gjatë sesionit plenar në shtator, i cili i mbajt në Strasburg.

“Në mënyrë që vendet e Ballkanit Perëndimor të vazhdojnë tutje, duhet të përqendrohen në vlerat evropiane, veçanërisht ato që kanë të bëjnë me të drejtat e njeriut dhe demokracinë”, ka theksuar Bogujevci.

Në vazhdim kryesuesja e delegacionit të Kosovës përmendi masat qe ka ndërmarrë Kosova për vënien në fuqi të legjislacionit dhe implementimin e tij, veçanërisht në drejtim të mbrojtjes së të drejtave të komuniteteve pakicë. Tutje ajo shtoi se Kosova ka nevoje për mbështetje në arritjen e përmbushjes së objektivave për t’iu bashkuar familjes evropiane.

Bogujevci ka theksuar se Kosova është pjesë e Komisionit të Venecias dhe Bankës për Zhvillim të Këshillit të Evropës dhe se misioni i Kosovës do të kompletohet me anëtarësimin e saj në Këshillin e Evropës.

Në vazhdim nënkryetarja e Kuvendit zhvendosi fokusin te çështja e liberalizimit të vizave për Kosovën, duke iu rikujtuar edhe një herë të pranishmëve se Kosova mbetet i vetmi vend në rajon pa të drejtë të lëvizjes së lirë.

Ajo ka pohuar se liria e lëvizjes do të kontribuonte më së shumti tek të rinjtë, të cilët do të mund të kenë mundësinë të marrin eksperienca nga jashtë, për të ndihmuar në zhvillimin e mëtutjeshëm të vendit te tyre.

Ndryshe, delegacioni i Parlamentit të Kosovës, në përbërje të Saranda Bogujevci, kryesuese e delegacionit, njëherësh nënkryetare e Parlamentit, si dhe deputeti Enis Kervan, anëtar dhe kryetar i Grupit Multietnik në Parlamentin e Kosovës, mori pjesë në takimin e radhës të Komisionit për Çështje Politike dhe Demokraci të Asamblesë Parlamentare të Këshillit të Evropës, i cili u mbajt më 3 dhe 4 nëntor në Budapest të Hungarisë. Gjatë këtij takimi, një nga temat kryesore të diskutimit ishte “Mbështetja e një perspektive evropiane për Ballkanin Perëndimor”.