Thirrjet e policisë/ Përgjigjet PD: Vetëm Edi Rama është i interesuar për dhunë!

Partia Demokratike informon Policinë Politike të frikacakut Edi Rama se ka vetëm një person të lidhur me krimin, që është i interesuar dhe i përgatitur për të ushtruar dhunë. Ai quhet Edi Rama. Duke ju përgjigjur kështu thirrjeve të policisë që të distancohen nga ata që inkurajojnë dhunë apo nga personat me rekorde të rënda kriminale, Sekretari i Përgjithshëm i PD, Gazment Bardhi vlerëson se kemi të bëjmë me thirrje sa qesharake, aq edhe kriminale, sepse Partia Demokratike nuk ka nxitur kurrë dhunë dhe as nuk ka pasur në rradhët e saj njerëz të krimit!

“Persona me rekorde të rënda kriminale nuk janë mes nesh, nuk janë mes protestuesve, por janë në qeveri dhe me qeverinë!”

Partia Demokratike informon Policinë Politike se asnjë nga rrugët në Tiranë nuk është më e rëndësishme se hapja e rrugës për të ardhmen, të cilën  shqiptarët do ta realizojnë nesër me bashkimin më të madh pas pluralizmit politik.

“Rrugën tonë nuk ka fuqi të na e bllokojë! Aq më pak një polici e keqpërdorur nga një kryeministër frikacak. Se ku do të protestojë populli këtë e vendos populli dhe jo Policia Politike e kryeministrit të dalë boje në sytë e shqiptarëve dhe të partnerëve ndërkombëtarë.”

Edi Rama dhe Policia Politike e dinë se numërimi mbrapsht ka filluar dhe se asgjë nuk mund ta ndalë dot popullin, thekson Sekretari i Përgjithshëm i Partisë Demokratike, Gazment Bardhi, duke e bërë të qartë se në shesh do të jenë për ta çliruar vendin nga e keqja ndërsa përfundon:

“Ndryshimi është në dorën e shqiptarëve të bashkuar dhe, që nga nesër, të gjithë bashkë, nuk do të lejojnë më një bandë të vendosë për ta, por do ta marrin fatin në duart e tyre!”