Ti që vë memoriale turke…
nga Orjola Pampuri
Kryellafazani i Tiranës, i ulur në karrigen ilegjitime, kujton se Tiranën ia ka trashëguar familja.
Ti mer çun, që e bëre fakt karrigen tënde pa garë, punën tënde në Bashkinë e Tiranës, kjo nuk do të thotë që të përvetësosh çdo cep të saj për interesat e tu dhe miqve tuaj që presin me lugë në brez t’i hanë dhe kockën e fundit këtij vendi.
Shqiptarët e kanë kuptuar, që vjedhjet tuaja nuk i mbulojnë më as brekushet e Ramës, dhe as monumentet fantazmë të tuat që mbijnë si kërpudha nëpër Tiranë.
Bëj një monument për Ardit Gjoklajn! Apo të vret sytë, se të hap plagë të vjetra që të trazojnë ndërgjegjen, sigurisht atë pak që të ka mbetur.
Mblidhuni një herë të gjithë ju pinjollë të bllokut, sigurisht ti bën përjashtim se ty të katapultuan e papritur e gjete veten të pasur duke zhvatur e mashtruar qytetarët, por e kam fjalën për bijtë, nuset e nipërit e bllokmenëve që sot janë ministra, deputetë e oligarkë, dhe bëni një listë të personave të pushkatuar, burgosur, internuar e torturuar.
Ata meritojnë një memorial, madje në një vend të rëndësishëm të Tiranës, që t’i kujtojmë brezave se sa i egër dhe i poshtër ka qenë ai regjim, e të jenë refuzues gjithnjë e më shumë të pinjollëve të tij.
Po ku kujton se je? Qytetarët e Tiranës janë paqësorë, por dinë të të denigrojnë me votë, siç të refuzuan me 30 Qershor, por ti nuk ngurove siç u bë në 61 bashki, të dyfishosh rezultatin, të vendosësh maskën e klounit, e të nisësh hingërimën fallco nga mëngjesi në darkë.
Përveç kullave, dhe zhvatjes së parave me tendera fiktive s’ke bërë asgjë tjetër. Provo të përdorësh transportin urban në këto ditë vere, të duket vetja sikur je në një vend pas lufte. Asnjë zgjerim i rrugëve në kryeqytet, përveç ngushtimit për korsitë e biçikletave, ku prioritet ishte korsia për ambulancat, që duhet të qëndrojnë në radhë në trafik, dhe jeta e pacientit brenda është gjithnjë e më shumë e rrezikuar. Tirana më 1.000.000 banorë, ka vetëm parkun e liqenit dhe me demek liqenit të Farkës.
Një turp i madh, betonizimi ka përfshirë çdo cep të Tiranës dhe ti Erion Veliaj del e llomotit për dy fidane e dy lojëra hekuri që u vendos në një lagje, edhe aty të mendosh se para para mund të jetë vjedhur.
Ti që vë memoriale turke dhe kërkon të prishësh teatrin, kërkon të nxjerrësh banoret e unazës së re nga shtëpitë pa i dëmshpërblyer 100 %, ti që Tiranën kërkon ta shndërrosh në lavatriçen e madhe të parave të pista, ku të lulëzojnë bizneset e atyre me të cilët ndani paratë e shqiptarëve të varfër.
Dita kur ju do të gjykoheni nga ligji dhe shqiptarët është fare afër, edhe pse tentoni të përdorni llafollogët për të shuar zjarrin që po fillon t’ju djegë, duke i nxitur të krijojnë panik me ide konspirative, dhe ëndrra të shuara, siç kanë tentuar në çdo kohë, por historia tregon që nuk ia kanë dalë.
Ndryshimi është afër
