Tiranë, FMN paralajmëron rreziqet në rritje
Në konferencën e përbashkët për shtyp me ministrin e Financave dhe Guvernatorin e Bankës së Shqipërisë, pas përfundimit të diskutimeve me FMN për Artikullin IV, vlerësimi i Fondit Monetar Ndërkombëtar, drejtuesja e misionit Anke Weber, theksoi se Shqipëria vazhdon të shquhet si një nga vendet me rritjen më të shpejtë në Bashkimin Europian.
Rritja reale e PBB-së pritet të jetë 3.5% në vitin 2025 dhe 3.6% në vitin 2026, e nxitur nga kërkesa e brendshme dhe turizmi. Sektori bankar mbetet i konsoliduar dhe likuid.
Sa i përket politikës fiskale, zonja Weber tha se FMN rekomandon rritjen e të ardhurave, përmes çuarjes përpara të reformës së taksës së pronës.
“Ne jemi të vetëdijshëm për rreziqet në rritje që po shfaqen dhe që kërkojnë vëmendje. Në huadhënien bankare është parë një rritje e fortë, dhe menaxhimi i valutës mbetet i rëndësishëm.
Për të arritur konvergjencën me të ardhurat e BE-së, nevojiten reforma në kapitalin njerëzor, rregullat e biznesit, si dhe hapa të mëtejshëm për përmbushjen e kritereve të Shqipërisë drejt anëtarësimit në BE”, pohoi ajo.
Ministri i Financave Petrit Malaj tha se rritja ekonomike po përkthehet në më shumë mirëqenie për vendin tonë.
Inflacioni është 2.2%. Në aspektin e deficitit të llogarisë korente, për vitin 2024 ai ishte 2.4% e PBB-së, çka lidhet edhe me deficitin fiskal.
Turizmi është motori kryesor i eksporteve shqiptare, me të ardhura që janë rritur me 7.7% në gjysmën e parë të vitit.
Investimet e huaja direkte janë rritur me 7% në vitin 2024, duke vijuar trendin pozitiv edhe për vitin 2025. Investimet kryesore mbeten në pasuritë e paluajtshme dhe turizëm.
Borxhi publik arriti në 54.2% në vitin 2024, niveli më i ulët i viteve të fundit.
Projektbuxheti 2028 mbetet një nga prioritetet tona strategjike, ku në fokus janë: rritja e qëndrueshme ekonomike me 4% në vit. Reduktimi i borxhit publik në 54.1% deri në fund të vitit 2026. Për Ministrinë e Financave, ruajtja e stabilitetit ekonomik do të vijojë të mbetet një angazhim i palëkundur”, nënvizoi ai.
Guvernatori i Bankës së Shqipërisë Gent Sejko tha rritja e ekonomisë vijon të jetë e qëndrueshme.
“Treguesit kryesorë të ekonomisë kanë mbetur solidë; në veçanti, inflacioni ka mbetur në nivele të ulëta, pranë objektivave për vitin 2025.
Presionet nga kostot e rritura dhe pagat janë stabilizuar falë mbiçmimit të kursit të këmbimit.
Rritja e kredisë ka mbështetur rritjen e konsumit dhe të investimeve në vend.
Në aspektin rregullator, kemi punuar për përmirësimin e rregulloreve në sektorin bankar dhe institucionet financiare, me qëllim mbrojtjen e konsumatorit”.
Projeksionet tona sugjerojnë se ekonomia do të vijojë të rritet me ritmet e vitit aktual.
Banka e Shqipërisë gjykon se balancat makroekonomike mbeten të qëndrueshme dhe se kushtet monetare janë të përshtatshme për të mbështetur rritjen ekonomike, pa krijuar presione inflacioniste./Monitor/
