Tiranë, niset drejt Kosovës kontingjenti i parë në misionin “KFOR 1”

Kontigjenti prej 30 efektivëve Komando të Forcave të Armatosura të Shqipërisë i janë bashkuar misionit të ndërkombëtar të NATO-s në Pejë të Kosovës, të koduar “KFOR 1“.

“Për herë të parë çojmë në këtë mision, misioni “KFOR 1‘ një kontingjent special të djemve dhe vajzave më të mirë që ne kemi në Forcat e Armatosura. Në këto ditë të sfiduara të paqes dhe sigurisë globale kjo e shton dyfish e rrit vëmendjen, por edhe përgjegjshmërinë e secilit prej nesh e secilit prej jush për të shërbyer me profesionalizëm, me disiplinë ushtarake, me dinjitet në respektim të kodit të etikës dhe të vlerave të aleancës tonë,” tha ministri Mbrojtjes, Niko Peleshi, në ceremoninë e nisjes së kontingjentit në këtë mision ku ishte i pranishëm edhe Shefi i Shtabit të Përgjithshëm të Forcave të Armatosura, gjeneralmajor Bajram Begaj.

“Punën tuaj atje do doja ta shikonit çdo ditë si një kontribut për paqen edhe sigurinë globale, si një kontribut për lirinë e qytetarëve tanë, e qytetarëve të botës, e qytetarëve të rajonit, sepse në 48 orët e fundit normaliteti siç e tha sekretari i Përgjithshëm Stoltenberg ka ndryshuar; jemi në një normalitet të ri. Pra, në një mënyrë të njëanshme, një fuqi si Rusia hoqi dorë nga parimet që mbanin si shtylla rendin botëror dhe riktheu historinë pas, në kohën e sferave të influencës edhe pushtimit të një shteti më të dobët nga një shtet më i fuqishëm,” tha ministri Peleshi duke përfunduar:

“Ne duhet të jemi të vëmendshëm, duhet të jemi vigjilentë, duhet të jemi me dinjitet përkrah aleatëve tanë dhe ta bëjmë flamurin tonë të valëvitet krenar krahas flamujve tjerë të Aleancës.”

Ndërsa Shefi i Shtabit të Përgjithshëm të Forcave të Armatosura, gjeneralmajor Bajram Begaj, tha se në situatën e krijuar przenca e këtij kontigjenti shqiptarë është më kuptimplotë dhe domethënës, për sigurinë, lirinë, paqen, për t’i shërbyer vendit tonë

“Siguria globale është më shumë se kurrë ndonjëherë e rrezikuar dhe e kërcënuar. Rajoni dhe vendi ynë nuk janë imunë ndaj këtyre veprimeve të Rusisë. Ndaj në këto situata të nxehta ju do të jeni atje për një kuptim të madh që bëhet edhe më kuptimplotë dhe domethënës, për sigurinë, lirinë, paqen, për t’i shërbyer Aleancës dhe vendit tonë“.

Ndryshe, 30 efektivë Komando të Forcave të Armatosura të Shqipërisë do të shërbejnë në këtë mision krah aleatëve kroatë dhe italianë në Pejë.