Tiranë, përmbysen të gjitha parashikimet e motit: Stuhi, reshje intensive shiu dhe breshër

Orët e para të mbrëmjes së sotme në Tiranë përmbysën të gjitha parashikimet e motit duke zëvendësuar temperaturat e larta me stuhi të frikshme, reshje intensive shiu, dhe, breshër.

Situatë e ngjashme raportohet edhe në qytetet tjera si Elbasan, Berat dhe Korçë.

Një stuhi e shoqëruar me erëra të forta deri në 11 km/h ka përfshirë pjesën më të madhe të kryeqytetit duke filluar rreth or 19:00. Dhe, çuditërisht, temperaturat që shkojnë deri në 30 °C, vazhdojnë të mbizotërojnë pavarësisht motit të keq që pritej të sjellë një freski.

Ndërkohë edhe në Elbasan, moti ka marrë një kthesë dramatike që prej orës 19:00, kur qyteti u përfshi nga reshje të dendura shiu, stuhi dhe erë të fortë. Këto kushte vështirësuan qarkullimin nëpër rrugë, duke kufizuar pamjen dhe duke e bërë të vështirë lëvizjen e qytetarëve.

Era e fuqishme ka shkulur shumë pemë në rrugë dhe parqe, duke shkaktuar shqetësime tek ata që ishin në rrugë duke lëvizur.

Me krijimin e këtyre kushteve, të gjitha rrugët në Tiranë dhe Elbasan janë zbrazur nga kalimtarët, ndërsa janë mbyllur dyerë e dritare për të evituar dëmet nga era e fortë.

Me ndryshimet që përjetuan qytetarët mbrëmjen e sotme, parashikimi i vetëm i motit që mbetet i besueshëm është “mot i paqëndrueshëm” pavarësisht raporteve të instituteve dhe shërbimeve meteorologjike.