Tiranë, themelohet Kolegji Pan-Shqiptar i Kirurgëve
Themelohet Kolegji Pan-Shqiptar i Kirurgëve, KPSHK.
Me pjesëmarrjen e kirurgëve nga të gjitha trevat shqiptare dhe mërgata, më 6-7 Shkurt u mbajt në Tiranë takimi për themelimin e Kolegjit Pan-Shqiptar të Kirurgëve, i cili pritet që të shërbejë si platformë e bashkëpunimit dhe koordinimit mbarëshqiptar në fushën e kirurgjisë.
Ceremonia u hap me fjalën e mirëseardhjes nga Kryesuesi mikpritës i Këshillit Themelues, Prof.Dr.Arben Beqiri, dhe, me fjalimin prezantues nga Kryesues i Këshillit Themelues, Prof.Dr.Rifat Latifi.
Kryesuesi i Këshillit Themelues lexoi dhe Rezolutën e Themelimit të KPSHK-së, e cila u miratua nga të gjithë delegatët. Në rezolutë mes tjerash theksohet se “Kolegji Pan-Shqiptar i Kirurgëve, KPSHK, do të jetë entitet profesional i pavarur me mision avancimin e praktikës dhe shkencës kirurgjikale, duke përcaktuar standardet e trajnimit në të gjitha disiplinat kirurgjikale, duke siguruar kujdes kirurgjikal të sigurt, modern, dhe të bazuar në prova, si dhe duke promovuar të studiuarit gjatë gjithë jetës, praktikën etike dhe llogaridhënien profesionale”.
Strukturat e përkohshme të KPSHK-së do të përgatisin statutin dhe dokumentacionin themelues, ndërsa pas miratimit të Statutit nga Kuvendi i delegatëve do të zgjidhen strukturat drejtuese me përgjegjësi dhe mandat të plotë.
Ndër të ftuarit e veçantë fjalë përshëndetëse mbajtën, Prof.Dr.Mentor Petrela, Zv/Kryeministri i i Parë i Maqedonisë së Veriut Dr.Bekim Sali, Ministri i Shëndetësisë i Kosovës, Dr.Arben Vitia, Ministri i Shëndetësisë i Maqedonisë së Veriut, Azir Aliu, si dhe rektori Universitetit të Mjekësisë Tiranë, Prof.Dr.Xheladin Draçini, dhe, rektori i Universitetit të Tetovës, Prof.Dr.Jusuf Zejneli.
Në emër të përfaqësuesve nga rajoni dhe mërgata përshëndetën gjithashtu anëtarët e Këshillit Themelues, Dr.Osman Zhuri (Kosovë), Prof.Dr.Ilir Hasani (Maqedoni e Veriut), Prof.Dr.Lumnije Kqiku (Austri), Prof.Dr.Alban Neziri (Zvicër), Prof.Dr.Mentor Ahmeti (SHBA), Dr.Valon Baraliu (Gjermani), Prof.Dr.Albion Totsi (Greqi), Dr.Daut Gjoni (Mali i Zi), dhe Dr. Beqir Nuhiu (Preshevë).
Ndryshe, anëtarë tjerë të Këshillit Themelues të KPSHK ishin edhe Prof.Dr.Arben Gjata, Prof.Dr.Fatos Olldashi, Dr.Edvin Selmani (Shqipëri), Prof.Asoc.Dr.Luan Jaha, Dr.Mentor Gorani (Kosovë), Prof.Dr.Mentor Ahmeti (SHBA), Dr.med. Kushtrim Shala (Gjermani), Prof.Dr.Rexhep Selmani (Maqedoni e Veriut), Prof.Dr.Ilirijana Haxhibeqiri (Bosnje Hercegovinë), dhe Prof.Dr.Albion Totsi (Greqi).
Koordinator i takimit ishte, Kujtim Salihu.
