Tiranës nuk i duhet Groucho Marxi, por Qazim Mulleti!

nga Agim Popoci

Në krye të herës duhet thënë se rasti që ka opozita në Tiranë në garën për Kryetar të Bashkisë me Kryebashkiakun e arrestuar si hajdut të fondeve publike dhe një kandidate të partisë në pushtet për Kryetare të re tmerrësisht të dobët si Ogerta Manastirliu, do të jetë i rrallë në historinë e këtij vendi të vjedhur dhe të varfër, për të mos thënë i papërsëritshëm!

Por, duhet pranuar, se edhe zgjidhja që kërkon kjo opozitë në këto rrethana, pas muaj të tërë protestash para Bashkisë Tiranë duke kërkuar dorëheqjen e hajdutit Erion Veliaj, kur ai u arrestua dhe u shkarkua, do të jetë e papërsëritshme; Pasi rezultoi se Partia Demokratike kishte kërkesën për dorëheqje por jo dhe kandidatin për ta zëvendësuar, ndërsa doli nëpër parti tjera opozitare për ta gjetur një kandidat të pavarur nga PD, dhe, e gjeti! Është ky, Florjan Binaj!

Reagimet e demokratëve ishin të shumta madje duhet thënë edhe të ashpra, jo vetëm për faktin se u shpërfillën demokratët dhe lidershipi i PD ra në kurthin e Edi Ramës me mediat e tij, por, kandidati i përzgjedhur për Kryetar të Bashkisë Tiranë përveç se ishte i pavarur nga PD, rezultoi se është shumë i varur nga bindjet e tija të majta; Madje, nga e kaluara e tij del se është i varur jo vetëm nga PS por edhe ai hajduti që e degjeneroi këtë Bashki dhe sot është në burg!

Përpjekjet titanike për ta mbuluar aktivitetin e tij komunisti në Kongreset e Partisë Socialiste me Edi Ramën në tribunë, që komunistja e vogël Ogerta ende nuk arriti ta shijoj, ose dhe shpërndarjen e supave sociale së bashku me Lal Hajdutin, duke e prezantuar si humorist të njohur dhe denoncues të korrupsionit nuk është se bindën njeri, sepse gjurma e tij nga ikja e partisë më të dyshimtë, përveç se të majtë, ku ishte themelues, “Shqipëria bëhet”, është shumë më e thellë se sa aktrimi që mund ti bëjë Florjani edhe njeriut të ndershëm dhe të drejtë!       

Si aktor profesionist, Florjan Bino mund të ketë bërë përpjekje për të aktruar sekretet e jetës, siç e i përshkruan komediani i njohur amerikan Groucho Marx, por Bashkia Tiranë nuk ka nevojë as për komedi dhe as për komedian, por, për një Kryetar si Qazim Mulleti që do të nxjerrë nga gropa, ku e ka futur një çoban si Erion Veliaj!

Dhe, kur themi Qazim Mulleti, jo ai “Prefekti” që njohin Florjan Bino, Adriatik Lapaj e të ngjashmit nga Besim Levonja, Pirro Mani dhe Vera Grabocka e Enver Hoxhës, por Qazimi që u shkollua në Manastir, Janinë, Stamboll dhe Vjenë, dhe atë që bëri për 2 vjet si i pari i Tiranës, Edi Rama dhe Erion Veliaj nuk e bënë as për 20 vjet!

Tiranës nuk i duhet një Groucho Marx sikur edhe ta realizon një film të dytë “A Night at the Opera” por një Qazim Mullet që ta menaxhoj atë që edhe krijoi, Akademinë e Arteve dhe Operan pa vjedhur fonde, një korpus universitar më të madh, Muzeum e Arkeologjisë që ndërtoi ta mbush me dëshmi arkeologjike, dhe, ti kujtoi këtij humoristit me portokall në Kongresin e Partisë Socialiste, se Edi Rama mund të bëhej Kryeministër për shumë arsye, por, selia në të cilën është vendosur sot e ka ndërtuar Qazim Mulleti!

Me Groucho Marx sërish mund të realizohej në Tiranë edhe një film i dytë “Monkey business”, duke hedhur plehra nëpër Bulevard apo para Kryeministrisë ku nuk mund të gjesh as edhe një kosh plehrash, apo të përsëritësh skena si ato kur u luajt finalja e UEFA Conference League në mes të Romës dhe Feyenoordit, dhe urina e tifozëve të këtyre skuadrave derdhej lum në pedonalen e Tiranës!

Por, kryeqytetit shqiptar i duhet një Qazim Mullet, për të realizuar një Tiranë me çezma, kosha të dedikuar për plehra nëpër gjithë Bulevardin dhe ndërtimin e banjove publike që sikur edhe gjithë skuadrat e UEFA Conference League të vijnë në Tiranë, tironsit të krenohen që jetojnë në qytet dhe jo në shurrore!

Në fund, për të mos i mbetur borxh komedianit të famshëm amerikan, Groucho Marx, për meritat që ka, vepra e tij filmike “Duck Soup” mund të shërbejë edhe si paralajmërim për Tiranën, se si mund të përfundoj me Kryetarin e Bashkisë, Flrojan Bino dhe që nuk e bënë dot Qazim Mulleti!

Po, Florjan Bino kur pranon të drejtoj Bashkinë Tiranë me buxhet 389 mlilionë euro pa asnjë ditë eksperience në menaxhimin e fondeve publike, mund të jetoj në shtetin Freedonia edhe nëse është në prag të falimentimit dhe shpëtimi i vetëm është një e ve e pasur, me kushtin që ai si i dashur i saj të jetë shef i këtij shteti, ku më shumë do të argëtohet se sa të merret me punët shtetërore.

Pyetja shtrohet, jo nëse Florjan Bino do të çante kokën për agjentët që mund të dërgoheshin nga shtetet fqinje dhe do të aneksonin Tiranën, siç është vendosur ngjarja në “Duck Soup” me Freedonia, por a do jepte këtë film Florjani në shtetin i cili drejtohet nga diktatori Edi Rama?!

Në rolin kryesor të këtij filmi që e luan Groucho Marx, diktatori italian Benito Mussolini e pa veten dhe nuk lejoi publikimin e “Duck Soup” në Itali! Groucho Marx nuk u shqetësua po aq sa edhe produksioni që këtë argument e përdorën si reklamë në shtetin e tyre!

Çfarë do të ndodhë në Tiranën kur Flrojan Bino pretendon të bëhet Kryetar i Bashkisë, dhe partia e diktatorit Edi Rama vazhdon ta quaj injorant poliglotin Qazim Mulleti i cili zotëronte gjuhën turke, arabe, gjermane, frënge, italiane, greke dhe serbe!

Ndryshe nga Florjan Bino dhe shefi i tij të cilit i jepte portokalle në Kongres, Edi Rama, që aktrimin në politik nuk e kanë dhe aq zët, sikur komediani amerikan Groucho Marx të ishte kandidat për Kryetar të Bashkisë do të ishte e lehtë të parashikohej, jo se ai duhet Tiranës, por, sepse shumë kohë më parë e ka thënë shumë qartë:

Sekreti i jetës është ndershmëria dhe drejtësia. Nëse mund ta aktrosh këtë, ia ke dalë!