Tokyo, Presidentja e Kosovës pritet nga Perandori Naruhito
Në prag të ceremonisë zyrtare të hapjes së Lojërave Olimpike Tokyo 2020, Presidentja e Kosovës, Vjosa Osmani, u prit së bashku me liderët tjerë botërorë nga Perandori i Japonisë, Naruhito ndërsa zhvilloi një takim edhe me Ministrin e Punëve të Jashtme të Japonisë, Toshimitsu Motegi.
“Ishte nder i veçantë të pritem në Pallatin e Perandorisë nga Perandori Naruhito i Japonisë. Së bashku me liderë të tjerë botërorë falenderuam Japoninë për mikpritjen e jashtëzakonshme dhe organizimin e lojërave olimpike përkundër rrethanave të rënduara të pandemisë,” thekson Vjosa Osmani përmes rrjetit social Facebook pas pritjes së organizuar nga Perandori Naruhito.
Pas pritjes së organizuar nga Perandori Naruhito, Presidentja e Kosovës, Vjosa Osmani, zhvilloi një takim dhe me Ministrin e Punëve të Jashtme të Japonisë, Toshimitsu Motegi.
“Ishte mundësi e mirë për të ftuar sa më shumë investime japoneze në Kosovë e për të kërkuar përkrahje për fuqizimin e Kosovës në arenën ndërkombëtare, por poashtu për të falenderuar institucionet japoneze për përkrahjen e vazhdueshme për vendin tonë,” thekson Presidentja e Kosovës pas takim me shefin e diplomacisë japoneze.
