Tomor Morina vazhdon të mbahet në paraburgim në Shkup

Gjasat që Tomor Morina të lirohet sot nga paraburgimi janë të vogla pavarësisht optimizimit të shprehur ditë më parë nga avokati Naser Raufi.

Nga Gjykata kompetente në Shkup nuk japin informata se kur do të sjellin vendim lidhur me kërkesën e avokatit që Morina të mbrohet në liri, deri në shqyrtimin e kërkesës së Serbisë për ekstradimin e tij. Ministrja e Drejtësisë e Maqedonisë së Veriut, Renata Deskoska, tha se gjykatat janë ata që duhet të vendosin dhe se kërkesa nga shteti serb për ekstradimin e Morinës ende nuk ka arritur.

“Ne deri tani si Ministri kemi kompetencë të vetme që përmes Ministrisë së Punëve të Jashtme t’i njoftojmë ambasadat, shtetasi i të cilave është personi në fjalë, i cili ka shtetësi të Britanisë dhe të Kosovës, dhe ne në pajtim me ata procedura tashmë kemi njoftuar ambasadat. Deri mbrëmë, po as sot nuk e kemi marrë kërkesën për ekstradim. Sapo ta marrim do e dërgojmë tek gjykatat të cilët do të duhet të vendosin ndaj asaj kërkese,” tha Renata Deskoska për AlSat.

Ndërkohë Ministri i Drejtësisë i Kosovës, Abelard Tahiri, arrestimin e Morinës me kërkesë të Serbisë e quajti shkelje flagrante të të drejtave të njeriut dhe mospërfillje të Konventave ndërkombëtare.

“Pa kaluar as një javë e plotë nga përpjekja për ta marrë në mënyrë arbitrare shtetasin tonë Tomor Morina, përmes fletarrestimeve ndërkombëtare irracionale që e kanë origjinën nga regjimi shtypës i Millosheviçit, Serbia vazhdon të impresionojë me shkeljet flagrante të të drejtave të njeriut, duke nxjerrë aktgjykime për qytetarët tanë, pa përfillur asnjë normë dhe asnjë parim nga Konventat ndërkombëtare, pjesë e së cilave është”, tha Abelard Tahiri.

Ndryshe, Tomor Morina është arrestuar të mërkurën e kaluar nga policia maqedonase, në bazë të një fletëarresti të lëshuar nga Interpol Serbia. Morina ka shtetësi të dyfishtë, atë të Britanisë së Madhe dhe Kosovës. Deri më tani ai kishte lëvizur pa asnjë problem në të gjitha shtetet evropiane.