“Toyota Yaris”/ Dëshmi prokurorëve belgë, Basha: Taulant Balla duhet të ishte në burg!
Pas dëshmisë prej 90 minutave që dha para prokurorëve belgë për 3.2 milionë eurot e drogës me Toyota Yaris, Lulzim Basha, tha se ka dhënë informacione për këtë çështje, më shumë se që i kishte bërë të njohura në publik ndërsa konstatoi se sot rreziku më i madh për Shqipërinë është astrimi i parave të drogës.
“Sot në pranga duhet të ishte Taulant Balla. Pastrimi i parave të drogës dhe krimit është rreziku kryesor që i kanoset sot Shqipërisë. Është rrezik politik, ekonomik, shoqëror dhe për stabilitetin e vendit. Edi Rama dhe qeveria e tij janë vënë në shërbim të pastrimit të parave të pisëta të krimit. Të gjitha koncesionet dhe projektet e qeverisë janë pastrim parash të drogës dhe të krimit. Projekti i stadiumit është pastrim parash. Projekti i teatrit është pastrim parash. Projekti i Unazës është pastrim parash. Morali i vetëm i Edi Ramës është paraja.”
Me këtë rast Lulzim Basha premtoi se opozita do ta ndalë Edi Ramën:
“Edi Rama është një hajdut psiqik që ka vetëm një ideal, një aspiratë, një moral: paranë. Për para po grabit dhe shet gjithë Shqipërinë. Për para bën aleancë me krimin dhe me çdo kënd. Ne do ta ndalim.”
Lufta kundër pastrimit të parave do jetë prioritet kombëtar, tha Kryetari i Partisë Demokratike, Lulzim Basha, duke u zotuar se çdo qindarkë e vjedhur nga Edi Rama do të gjurmohet nga qeveria e PD:
“Ne do të ndjekim dhe gjurmojmë çdo qindarkë që Edi Rama dhe kriminelet po mundohen të futin në ekonomi. Çdo koncesion, çdo ndërtim, çdo kontratë do të gjurmohet për çdo qindarkë, si për ata që e kanë dhënë edhe ata që e kanë marrë. Lufta kundër pastrimit të parave do jetë prioritet kombëtar.”
Ndryshe, autoritetet belge po hetojnë prej disa muajsh paralelisht me Shqipërinë në përpjekje për të zbuluar personat e implikuar në pastrimin e parave. Aksioni për bllokimin e eurove u finalizua me 24 qershor të vitit të kaluar kur rastin e denoncoi në seancë parlamentare Kryetari i Partisë Demokratike, Lulzim Basha, ndonëse automjetet që vinin nga Belgjika, kishte dy ditë që ishin bllokuar në portin e Durrësit, dhe në to ishin fshehur 3.4 mln euro dhe policia nuk e kishte deklaruar rastin.
