“Toyota Yaris”/ Lulzim Basha në SPAK, merret në pyetje nga prokurorët belgë

Kryetari i shkarkuar i PD, Lulzim Basha, pasi është marrë sot në pyetje në SPAK nga prokurorët belgë lidhur me çështjen “Toyota Yaris” tha se hetimi në Belgjikë vazhdon dhe se do të bashkëpunoj me drejtësinë belge.

“Kam kënaqësinë të jem përsëri me praninë e përfaqësuesit e drejtësisë belge që kanë konfirmuar të vërtetën dhe kanë hedhur poshtë gënjeshtrën. Çështja në Belgjikë nuk është mbyllur, siç ka ndodhur me çështjen këtu. Paratë e konfiskuara mbeten të konfiskuara. Hetimi në Belgjikë vazhdon dhe ata janë të angazhuar ta dërgojnë deri në fund. Në këtë kuadër, do të bashkëpunoj me drejtësinë belge dhe të çdo vendi partner në luftën ndaj korrupsionit. E bëj këtë me vetëdijen që ky është një mision që i përket PD, në emër të gjithë shqiptarëve. Ky është proces që bëhet, por të tillë ka të shumtë, krimi i organizuar është problem i madh.

Një gjë dua t’i siguroj të gjithë shqiptarët, unë dhe PD jo vetëm jemi në dispozicion të drejtësisë belge, por të drejtësisë në tërësi dhe do të vazhdoj të jemi kundër krimit të organizuar, duan apo nuk duan të korruptuarit, non gratat e shpallur e të pa shpallur. Çështja është mbyllur. Janë ndarë paratë mes politikanëve të korruptuar. Paratë janë konfiskuar, procesi vijon në Belgjikë dhe kanë mbështetjen tonë të plotë,” tha Lulzim Basha pasi u mor në pyetje nga prokurorët belgë duke folur tashmë edhe për SPAK të ndershëm dhe jo me fjalorin akuzues si zakonisht ndërsa përfundoi.

“Punonjësit e ndershëm të SPAK dhe BKH kanë mbështetjen tonë në këtë luftë. Ata s’janë vartësit e askujt përveç ligjit dhe taksapaguesve shqiptarë.”