Trafik droge me Shqipërinë/ Ulqin, sulmohet bashkëpunëtori i drejtësisë, Ministri: Shpresojmë që Rudolf Elezoviç të jetë gjallë!

Pas arrestimit të 24 personave që akuzohen si organizator dhe anëtar të grupit kriminal që kanë trafikuar 0.5 ton marijuanë nga Shqipëria në Mal të Zi, ulqinaku i cili mori statusin e dëshmitarit bashkëpunëtor, prokurorëve u ka rrëfyer punët e paligjshme të disa policëve. Askush nga zyrtarët e policisë, nuk ka saktësuar nëse ky bashkëpunëtor i drejtësisë foli për lidhjet e mundshme ose punët me ish-zyrtarin e policisë, Rudolf  Elezoviç i cili është zhdukur ndërsa u kishte thënë familjarëve se po shkon në Shkodër. Ministri i Punëve të Brendshme i Malit të Zi, Sergej Sekuloviç, nuk dha detaje as dje në parlament por u mjaftua me lutjen: “Shpresoj që ky njeri të jetë gjallë!”

Sulmohet bashkëpunëtori i drejtësisë  

Katër skuterëve i është vënë flaka në lagjen Totoshi të Uqlinit, mbrëmjen e së dielës duke u gdhirë e hëna, e sipas informacioneve jozyrtare, shkruan e përditshmja e Podgoricës “Vijesti”, ato janë pronë e A.K. për të cilin thuhet se ka marrë statusin e dëshmitarit bashkëpunëtor me drejtësinë në çështjen “Zamka” / lexo shqip: Kurthi/.

Ulqinaku A.K. i cili në fillim të muajit shkurt është arrestuar me 23 persona të tjerë në aksionin e policisë të koduar “Zamka”, sipas burimit të gazetës, është liruar pasi ka arrit marrëveshje me prokurorinë.

Pas dëshmisë disa prej orëve në Prokurorinë Speciale, SDT, ai ka dhënë disa fakte komprometuese  edhe për personat që nuk janë arrestuar në aksionin e muajit shkurt, dhe për momentin ishin në poste të larta në Drejtorinë e Policisë.

Askush nga personat e autorizuar nuk ka dashur të saktësoj nëse ky dëshmitar ka folur për lidhjet e  mundshme ose punët me ish-zyrtarin e lartë të policisë, Rudolf  Elezoviç, i cili sipas familjarëve, është zhdukur para disa ditësh.

Prokuroria Speciale nuk i është përgjigjur gazetës “Vijesti” nëse SDT ka dorëzuar kërkesë dhe nëse gjykata ka marrë vendim me të cilin të arrestuarit A.K. i ipet statusi i dëshmitarit bashkëpunëtor. Këtë përgjigje nuk e ka dhënë as Gjykata e Lartë

“Ju informojmë se gjykata nuk mund të jep informacione nëse dikujt i jepet statusi i dëshmitarit bashkëpunëtor ose jo, sepse bëhet fjalë për procedura që janë të sigluara SEKRET,” thuhet në përgjigjen e këshilltares për marrëdhënie me publikun, Aida Muzuroviç.

Ndryshe, policia ka arrestuar më 10 shkurt 24 persona që akuzohen si organizator dhe anëtar të grupit kriminal që kanë trafikuar sasi të mëdha të marijuanës nga Shqipëria në Mal të Zi, për të vazhduar drejtë shteteve të rajonit dhe vendeve të Bashkimit Europian.

“Nga hetimet e deritanishme, është ndërprerë trafiku i cili është shfrytëzuar nga pjesëtarët e këtij grupi kriminal, ku në 11 sekuestrime individuale është kapur dhe sekuestruar 0.5 ton marijuanë,” është theksuar në atë kohë nga Drejtoria e Policisë. 

Gjatë kontrollit janë sekuestruar pesë makina, revole dhe armë gjahu si dhe peshore precize, para, shumë telefona dhe karta celulari…

Policia në atë kohë është shprehur se aksioni i koduar “Zamka” është realizuar për 10 muaj nga Prokuroria Speciale dhe ajo e Lartë si dhe shërbimet partnere ndërkombëtare.

“Në aksionin e suksesshëm që është zbatuar nga Shërbimi për luftën kundër trafikut të drogës  kanë marrë pjesë 180 zyrtarë të policisë, pjesëtarë të Policisë Speciale, Policisë Kufitare dhe Ulqinit, Qendra e Sigurimit Tivar, Qendra e Sigurimit Nikshiç, Qendra e Sigurimit Herceg Novi, Qendra e Sigurimit Podgoricë etj.

Është kryer kontrolli në 30 lokacione ndërsa janë arrestuar: S.U., A.K., I.LJ., M.R., D.K., B.I., A.M., I.K., D.D., S.Đ., D.M., E.N., N.V., M.K., P.K. që të gjithë nga Ulqini, si dhe I.P., B.P., T.P., R.K., S.V., S.M., P.D. nga Nikshiç, R.P. nga Podgorica dhe Nj.V. nga Tivari,” është thënë nga Drejtoria e Policisë.

Bashkëpunëtori nuk mund të jetë kreu i grupit kriminal

Sipas Kodit të Procedurës Penale të Malit Zi, ZKP, prokurori i shtetit mund ti propozoj gjykatës që si bashkëpunëtor të merret në pyetje një pjesëtar i organizatës kriminale, nëse dëshmia e tij do të kontribuoj dukshëm në dëshmimin e veprës penale dhe veprës së atyre që e kanë kryer, ose do të ndihmoj në zbulimin, dëshmimin dhe parandalimin e veprave tjera penale.

Dëshmia e tij, sipas ZKP, duhet të jetë më “e fortë” se pasojat e veprës penale për të cilën akuzohet.

“Dëshmitari bashkëpunëtor nuk mund të jetë personi për të cilin ka dëshmi të bazuara se është organizator ose kreu i organizatës kriminale, përkatësisht grupit kriminal,” thuhet në Kod.

Për propozimin e prokurorit për dëshmitar bashkëpunëtor vendos gjykata në seancë me dyer të mbyllura, ku përcaktohet nëse janë plotësuar kushtet ligjore…

Sekuloviç: Gjurmët ekzistojnë…

Deputeti i DF, Dejan Gjuroviç ka pyetur dje në parlament ministrin e Punëve të Brendshme, Sergej Sekuloviç se si është e mundur të zhduket ish-zyrtari i lartë, përkatësisht Shefi i Qendrës së Sigurimit në Ulqin.

“Shpresoj se do të jetë rasti i fundit në Mal të Zi dhe se nuk do të transferohet lufta nga një qytet në tjetrin dhe se me miratimin e Ligjit të ri, fëmiëjt tanë do të lëvizin të sigurt. Nuk mund të largohemi nga plenumi, dhe ky rast të mos përmendet. Bëni gjithçka që është e mundur që të ketë paqe në Mal të Zi,” tha Gjuroviç.

Sekuloviç tha se është i informuar për rastin dhe se ka dhëna operative që nuk mund ti bëjë publike.

“Shpresoj që ky njeri të jetë gjallë, e për të tjerat do shohim. Gjurmë të caktuara ka, por nuk mund ti bëjë publike tani,” tha Sekuloviç.