Trafik droge/ Muriqan, Policia shqiptare: Arrestohet një serb; Mali i Zi arreston edhe 3 persona…
Policia Kufitare e Shqipërisë dhe ajo e Malit të Zi, kanë goditur një tentativë për trafik ndërkombëtar të lëndëve narkotike. Por arrestimi i atyre që trafikuan këtë drogë nuk përfundoi me kaq në Mal te Zi per dallim nga Shqiperia! Policia e Malit të Zi raporton se ky aksion u krye dje ndersa sot në kuadër të luftës kundër trafikut të marijuanës nga Shqipëria dhe Kosova drejtë Malit të Zi janë arrestuar edhe tre persona.
Policia shqiptare ka bërë të ditur sot se në vendkalimin Muriqan – Sukobinë, ishte përzgjedhur për kontroll në vijën e dytë, në dalje të Shqipërisë një mjet që drejtohej nga shtetasi M.Sh., 55 vjeç, me pasaportë Serbe.
Gjatë kontrollit të përbashkët u përdor edhe qeni antidrogë i Policisë shqiptare, i cili dha sinjalin për prani të lëndës narkotike tek pjesa e pasme e automjetit.
Gjatë kontrollit të përbashkët fizik të dy policive në automjet u konstatua një sasi lënde narkotike, e dyshuar kanabis.
Në bazë të marrëveshjes së përbashkët, veprimet e mëtejshme procedurale po i kryen Policia e Malit të Zi. Specialistët e Antidrogës të DVP Shkodër po vijojnë veprimet për zbardhjen e plotë të rastit, kapjen dhe vënien para përgjegjësisë ligjore të personave të tjetër që janë të përfshirë në këtë tentativë trafiku.
Ndërsa Policia e Malit të Zi bënë të ditur se dje është arrestuar M.Sh. 54 vjeç nga Paraçini i Serbisë, kur në vendkalimin kufitar Sukobin- Muriqan, kanë gjetur në makinën e tij 18 kilogram marijuanë.
“Zyrtarët e Policisë Kufitare në Ulqin dhe Zyrës Doganore në Sukobin, sot, më 22.01.2019. rreth orës 09:00, në bashkëpunim me Zyrtarët e Policisë Kufitare të Shqipërisë, në këtë pikë kufitare kanë kryer kontrollin e një makine “Peugeot 307“, me targa të Republikës së Serbisë, që drejtohej nga M.Sh. (54) nga Paraçini, shtetas i Republikës së Serbisë, ” thekson komunikata.
Zyrtarët e policisë dhe doganës kanë gjetur një bunker të ndërtuar në vendin e gomës rezervë dhe pjesën e pasme të makinës 22 pako me marijuanë me peshë 18.319 kg.
Në përputhje me Protokollin e Punës së Përbashkët të vendkalimit kufitare Sukobin – Muriqan, personi, makina dhe marijuana janë marrë nga Zyrtarët e luftës kundër trafikut të drogës.
Dhe derisa Policisë Shqiptare i është dashur 24 orë për të hartuar një komunikatë ajo e Malit të Zi ka vazhduar aksionin kundër trafikut të drogës duke arrestuar edhe tre persona.
Kështu sot Policia e Malit të Zi bënë të ditur se ka arrestuar tre persona gjatë aksionit “Chat” në kuadër të luftës kundër trafikut të marijuanës nga Shqipëria e Kosova në Mal të Zi. Pra, nuk ishte rastësi!
“Zyrtarët e policisë, pas kontrollit të banesave dhe disa lokaliteteve, kanë arrestuar V.U. (26) nga Podgorica, M.Gj. (60) nga Podgorica, S.A. (37) nga Bosnje Hercegovina me qëndrim të përkohshëm në Budvë me dyshimin se kanë kryer veprën penale të prodhimit dhe trafikimit të substancave narkotike. Padia është ngritur edhe kundër D.U. (37) nga Podgorica. Kundër M.Gj. dhe V.U. gjithashtu është ngritur padi për armëmbajtje pa leje dhe mjete shpërthyese. Policia është në kërkim të J.A. (19) nga Serbia,” thekson Policia e Malit të Zi.
