Trafik droge në Itali dhe Gjermani, “Tibus” arreston 55 persona – 27 shqiptarë!

Megaoperacioni i koduar “Tibus” nga policia italiane ka vënë në pranga 55 persona, 27 prej të cilëve shqiptarë ndërkohë Policia e Shtetit bënë të ditur se në kuadër të këtij operacioni i cili u realizua në Itali, Shqipëri dhe Gjermani, ka arrestuar në Vlorë 5 persona.

Mediat italiane raportojnë se dyshimet e para të policisë datojnë që në vitin 2018. Karabinierët, nga kontrollet e tyre kishin vrenjtur se në një stacion autobusi në Tributina, gjithmonë kalonte një nigerian, duke shtyrë një karrocë me rrota, brenda së cilës kishte rroba të përdorura. Por pas një kontrolli, policia mësoi se brenda karrocës nuk kishte rroba, por kilogramë të tëra droge.

Pas dy vitesh intensive hetimesh, ndjekje dhe përgjimesh, policia e Romës ka arritur të godasë një nga organizatat më të mëdha ndërkombëtare. Droga dyshohet se vinte nga Shqipëria dhe tregtohej në Itali dhe Gjermani.

Droga dërgohej drejt Gjermanisë me autobusë dhe përmes linjës hekurudhore. Ndërsa sasia shpërndahej më së shumti nga nigerianë, të cilët kamufloheshin si endacakë e të pastrehë. Organizata, e cila drejtohej nga shqiptarë, kishte krijuar një sistem të mirëorganizuar. Operacioni është zhvilluar në tre shtete, Gjermani, Shqipëri dhe Itali. Në Shqipëri, droga dyshohet se prodhohej në Vlorë.

Të arrestuar janë 55 persona, të akuzuar për vepra të ndryshme penale. Ata janë identifikuar si 52 burra dhe 3 gra, ku më konkretisht, 27 shtetas janë shqiptarë, 23 nigerianë, 4 itailanë dhe 1 gambian.

Ndërkohë në Shqipëri, operacioni “Tibus” është realizuar nga FAST Albania, FNSH, Drejtoria Vendore e Policisë Vlorë dhe Interpol Tirana ku sot në Vlorë kanë përfunduar në pranga 5 shtetas: Albano Jazaj 25 vjeç, Dionis Maskaj 23-vjeç, Eriseld Nelaj 27-vjeç, Rezart Elmazaj 31-vjeç dhe Zigur Aliaj 25-vjeç.

Njoftimi policisë:

Policia e Shtetit, pjesëmarrëse në një tjetër operacion ndërkombëtar antidrogë të koduar “TIBUS”.

Operacioni i zhvilluar në të njëjtën kohë në Itali, Shqipëri dhe Gjermani.

Në Shqipëri operacioni është zhvilluar nga FAST Albania, FNSH, Drejtoria Vendore e Policisë Vlorë dhe Interpol Tirana. Gjatë operacionit “TIBUS”, në Vlorë, mëngjesin e sotëm janë kapur nga FAST Albania, FNSH dhe strukturat e DVP Vlorë, 5 shtetas, të cilët janë arrestuar me qëllim ekstradimi drejt Italisë, konkretisht: A. J., 25 vjeç, D. M., 23 vjeç, E. N., 27 vjeç, R. E., 31 vjeç dhe Z. A., 25 vjeç, banues në Vlorë, Shqipëri.

Arrestimi i këtyre shtetasve është bërë pasi ishin shpallur në kërkim ndërkombëtar nga Interpol Roma, Itali, pasi Gjykata e Romës, Itali ka lëshuar urdhër-arrestin për këta shtetas, për kryerjen e veprës penale “Organizatë kriminale me qëllim trafikun e narkotikëve”.

Këta shtetas, në bashkëpunim me pjesëtarët e tjerë të organizatës kriminal, dyshohen se nga data 01.06.2018 deri më 21.01.2019, kanë marrë pjesë në role të ndryshme në një organizatë kriminale, me qëllim trafikimin e lëndëve narkotike (marijuanë) nga Shqipëria në drejtim të Italisë dhe vendeve të tjera të Evropës.

Interpol Tirana, në bashkëpunim me Interpol Romen dhe agjencitë e tjera ligjzbatuese, vijon procedurat për ekstradimin këtyre shtetasve drejt Italisë.

Policia e Shtetit tregoi edhe njëherë seriozitet e besueshmëri tek partnerët për të luftuar së bashku krimin e organizuar dhe fton qytetarët që të denoncojnë në numrin pa pagesë 112 dhe në Komisariatin Dixhital, çdo rast të paligjshmërisë, duke iu garantuar anonimat të plotë dhe reagim të menjëhershëm e të paanshëm.