Trafik droge nga Amerika Latine, SPAK në Shkodër: 13 urdhërarreste, mes tyre edhe zyrtarë policie

Struktura e Posaçme Kundër Korrupsionit dhe Krimit të Organizuar ka zhvilluar një operacion të gjerë në Shkodër, me 13 urdhërarreste ndaj një grupi kriminal të dyshuar për trafik ndërkombëtar droge nga Amerika Latine drejt Shqipërisë.

Raportohet se 8 persona janë arrestuar, ndërsa 5 të tjerë janë shpallur në kërkim.

Burime bëjnë me dije se bëhet fjalë për disa raste të trafikimit të drogës nga 850 deri në 1000 kilogram.

Grupi i organizuar, i dyshuar për trafikun e lëndëve narkotike nga Amerika Latine drejt Shqipërisë, u zbulua pas bisedave të tyre në aplikacionin Sky ECC.

Në mesin e të dyshuarve ndodhen edhe zyrtarë të Policisë së Shtetit, të cilët dyshohet se kanë ndihmuar grupin në shmangien e kontrolleve dhe lehtësimin e trafikut.

Përveç akuzës për trafik ndërkombëtar të lëndëve narkotike, ndaj disa prej personave rëndon edhe akuza për ushtrim të ndikimit të paligjshëm ndaj personave që ushtrojnë funksione publike.