“Trafikantët e pushtetit sëmuren në burg”/ “Vol-vo 4”, Cine i Shijakut përfundon në shtëpi!
Nga viti 2013 policia kurrë nuk ka raportuar ndonjë përkeqësim shëndetësor të trafikantëve para, gjatë ose në përfundim të trafikut ndërkombëtar të drogës. Por kjo zakonisht ka ndodhur pas përfundimit ceremonial të aksioneve policore kur në pranga kanë përfunduar trafikantë të njohur ndërkombëtar, të njohur jo vetëm ndër shqiptar. I tillë është rasti edhe me “Cinen” e Shijakut.
Ndonëse i arrestuar në kuadër të mega operacionit policor të koduar “Vol-vo 4”, Jasin Kala, alias Jasin Avdyli, me pseudonimin “Cine” i Shijakut, që Qeveria u mburrë me ditë të tëra, tashmë me vendim Gjykate ish-polici i “Bandës së Avdylajëve” përfundon me masën “arrest shtëpie” duk e dhënë fund masës “arrest me burg” për siç thuhet problemeve me shëndetin.
E keqja nuk përfundon me vajtjen në shtëpi të Cines së Shijakut por me mosreagimin qytetar, i cili këtë përfundim tragjiko-komik të një trafikanti ndërkombëtar të drogës e konsideron normalitet, kur mundet që edhe Ish-Ministri i Brendshëm, Saimir Tahiri, të bënë sehir nga shtëpia dhe të akuzohet për organizim të grupit të strukturuar kriminal dhe trafik ndërkombëtar të drogës.
Ndryshe, “Cine” i Shijakut u arrestua bashkë me 26 shtetas të tjerë për veprat penale ”Prodhimi dhe shitja e narkotikëve”, ”Trafikim i narkotikëve”, në bashkëpunim në formën e posaçme të grupit të strukturuar kriminal dhe organizatë kriminale, si dhe pastrim i produkteve të veprës penale.
Gjatë këtij operacioni gjithashtu u godit një laborator i përpunimit të heroinës në fshatin Brenog në Has, ku ndër të tjera janë sekuestruar 182.5 kg morfinë, e ndarë në 175 pako, 22 litra lëndë e lëngshme, të cilat përdoreshin për prodhimin e heroinës.
Procedimi për këtë operacion ka nisur pas një referimi të Policisë së Shtetit në Prokurorinë e Krimeve të Rënda.
Në këtë procedim penal janë me mijëra orë përgjime, filmime, përgjime ambientale, vëzhgime me dron, mijëra faqe me shkresa dhe këmbim informacioni e korrespodencë me agjenci ligjzbatuese brenda e jashtë vendit.
