Trafiku në Finlandë, baza në Vlorë, Berat e Kuçovë: Arrestohen 55 persona, sekuestrohen 300 kg drogë

Një operacion ndërkombëtar i zhvilluar nga SPAK në bashkëpunim me autoritetet finlandeze çoi në goditjen e një grupi kriminal shqiptar të përfshirë në trafikun e drogës në Finlandë.

Në deklaratën e përbashkët për media, Komisari finlandez përgëzoi të gjithë pjesëmarrësit për suksesin e këtij hetimi që nisi dy vite më parë në Finlandë dhe u finalizua me arrestimin e 55 personave dhe sekuestrimin e rreth 300 kilogramëve lëndë narkotike të trafikuara nga Spanja dhe Holanda.

“Përgëzoj të gjithë kolegët që morën pjesë në këtë operacion të përbashkët. Dy vite më parë u ndërmor një hetim në shkallë të gjerë në Finlandë që u konkludua me arrestimin e rreth 55 shtetasve. U sekuestruan rreth 300 kg drogë që u trafikua nga Spanja dhe Holanda. Nga sasia totale e lëndës narkotike, rreth 170 kanë qenë amfetaminë, 10 kg ishte kokainë, rreth 100 kg marijuanë. Nga hetimi i ndërmarrë në Finlandë rezultoi që drejtuesit kryesor të këtij trafiku droge ishin shtetas nga Shqipëria,” tha Komisari finlandez ndërsa prokurori Alfred Shehu sqaroi se Grupi kishte bazën në disa qytete të Shqipërisë, përfshirë Vlorën, Kuçovën, Beratin dhe Tiranën.

Dy prej drejtuesve kryesorë janë nga Vlora, ndërsa pjesa tjetër e anëtarëve vepronte në zonat përreth Kuçovës dhe Beratit, disa prej tyre jetonin edhe në Tiranë. Përtej aktivitetit kriminal, shumica prej tyre paraqiteshin si qytetarë të lirë dhe zhvillonin aktivitete të ligjshme, me shumë prej tyre që lëviznin jashtë vendit.

Në komunikimin e brendshëm të grupit, anëtarët përdornin aplikacione të koduara si Telegram dhe Signal, duke e bërë komunikimin të sigurt dhe të vështirë për tu ndjekur nga autoritetet. Një përfaqësues i policisë finlandeze theksoi se përdorimi i këtyre platformave është i zakonshëm mes grupeve kriminale moderne.

Prokurori i SPAK, Alfred Shehu, bëri të ditur se gjatë vitit 2024 janë zbuluar dhe sekuestruar sasi të ndryshme lëndësh narkotike. Në maj, SPAK kërkoi masa sigurie për 11 persona, ndërsa Gjykata e Posaçme Kundër Korrupsionit dhe Krimit të Organizuar miratoi arrest me burg për ta, tha prokurori për Operacionin i cili u realizua në orët e para të mëngjesit të sotëm

“Gjatë vitit 2024 janë zbuluar dhe sekuestruar sasi të ndryshme lëndësh narkotike. Në maj, SPAK depozitoi kërkesën për masat e sigurimit për 11 persona, dhe Gjykata e Posaçme Kundër Korrupsionit dhe Krimit të Organizuar miratoi arrest me burg për ta. Operacioni u zhvillua në orët e para të mëngjesit të sotëm, me pjesëmarrjen edhe të policisë finlandeze. Si pasojë, u arrestuan 9 persona, ndërsa po vijojnë përpjekjet për kapjen e dy të tjerëve.

Gjatë kontrollit u konfiskuan 8 makina, telefona celularë dhe shumë dokumente, nga të cilat një pjesë e madhe përmbajnë informacione të rëndësishme në gjuhën finlandeze që lidhen me aktivitetet kriminale të personave të përfshirë,” tha prokurori Alfred Shehu.

Kryeprokurori i Finlandës, Hans, foli mbi mënyrën e veprimit të grupeve kriminale që trafikonin lëndë narkotike drejt Finlandës, transportin me kamionë të grupit ku kishte edhe rumunë, aziatikë e afrikanë:

“Një nga rrugët nga Holanda për në Finlandë me kamionë me targa polake dhe shofer polak është shumë e zakonshme, pasi amfetamina ka konsum të lartë në Finlandë. Kanabisi trafikohej nga Spanja në drejtim të Finlandë,” tha Kryeprokurori i Finlandës për operacioni ku u arrestuan 55 persona, 10 prej të cilëve janë me shtetësi shqiptare, ndërsa ndër të arrestuarit janë edhe polakë dhe finlandezë sqaroi prokurori Alfred Shehu:

“Janë përfshirë rumunë, aziatikë dhe afrikanë në këto rrjete, ndërsa karakteristikë e grupeve ka qenë bashkëpunimi i tyre për qëllime kriminale. Dy nga grupet organizonin trafikimin nga Shqipëria drejt Spanjës dhe më pas në Finlandë, ku kishin rrjetin e shpërndarësve. Një grup tjetër operonte vetëm në Finlandë për blerjen dhe shitjen e drogës, ndërsa një tjetër përdorte shërbimin postar për trafikim.”