Tragjedia në Genova, shkon në 37 numri i viktimave, publikohet emri i një shqiptari…

Numri i viktimave të tragjedisë në Genova, ku u shembë ura Morandi, shkoi në 37 dhe mendohet se do të jetë 50, në bazë të gjendjes shëndetësore së të plagosurëve, raporton Genova 24 duke paralajmëruar edhe vizitën e kryeministrit Conte këtë mëngjes në spitalet San Martino dhe Villa Scassi.

Duke ju referuar burimeve të Ministrisë së Brendshme që konfirmojnë shifrën prej 37 të vdekurve, thuhet se në mesin e tyre janë tre fëmijë, një djalë 8-vjeçar dhe dy adoleshentë të moshës 12 dhe 13 vjeçare.

Ndërkohë gazetarja e OraNews, Alba Kepi ka informuar se mediat italiane kanë publikuar  emrin e një shqiptari në mesin e viktimave të shembjes së urës në Genova. Ai është Marjus Djerri, 28 vjeç, djaloshi i cili së bashku me një koleg të tij po kalonin në autostradë me makinën e punës.

“Mbrëmë mjekët e spitalit më konfirmuan se ishin identifikuar 26 viktima  ndërsa ka të tjerë ende të paidentifikuar. Asnjë emër viktime nuk mund të jepet pa kaluar më parë procesit të verifikimit dhe ekspertizës mjekoligjore,”  raporton Alba Kepi duke shtuar se familjarët kanë kërkuar që mbrëmë në spital por informacionet kanë qenë tepër të rezervuara ndërsa ambasada shqiptare nuk konfirmon ende ndonjë viktimë.

Ndryshe, Genova 24 informon gjatë natës u nxorën shumë trupa dhe vazhdon punën e shpëtimit dhe rimëkëmbjes ndërkohë pesë trupa ende nuk janë identifikuar.

Kryeministri Conte i cili mbërriti mbrëmë në Genova shpalli “një plan të jashtëzakonshëm për të monitoruar gjithë infrastrukturën rrugore, veçanërisht ato që janë ndërtuar shumë kohë më parë”