Tragjedia në Kroaci, 20 të plagosurit sot nisen drejt Kosovës. Shoferi mund të dënohet 15 vjet burg
Pas aksidentit afër Sllavonski Brodit që sipas autoriteteve kroate konsiderohet dhe aksidenti më i tmerrshëm në historinë e Kroacisë, ku autobusi me targa të Kosovës me 67 pasagjerë dhe shofer doli nga rruga, 10 persona humbën jetën, 44 u plagosën 15 prej të cilëve janë në gjendje të rëndë sot ka lajme të mira për të mbijetuarit.
Drejtori i Spitalit në Sllavonski Brod, Josip Samarxhiç e ka konfirmuar për televizionit publik HRT se 20 pacientë gjatë ditës do të nisen në shtëpi.
“Dy prej të plagosurve në gjendje të rëndë, sot janë stabël. Gjendja e tyre është nën monitorim dhe ndryshimi i vetëm është se gjatë ditës janë bërë disa ndërhyrje kirurgjike ndaj të plagosurve në aksident,” tha drejtori i spitalit “Dr. Josip Bençeviç” në Sllavonski Brod, Prim.Dr.Sc.Josip Samarxhiç.
“Autoritetet këtu kanë bërë gjithçka që është e mundur dhe janë kujdesur për të plagosurit që nga momenti i parë. Për ata që kishin më shumë fat, këtu janë kujdesur për vendosjen e tyre. Ne tani po koordinohemi që njerëzit sa më shpejtë të shkojnë në Kosovë ose të kthehen në Gjermani. Këtë duhet bërë. Gjithashtu duhet të kujdesemi për të gjithë pacientët dhe ata që humbën jetën, që sa më shpejtë të shkojnë në Kosovë,” tha Ministri i Brendshëm i Kosovës.
“Sot po planifikojmë që numrin më të madh ta lëshojmë në shtëpi, ata me plagë më të lehta që janë kuruar. Do të biem dakord për strehimin e tyre dhe çfarë do të bëjmë tutje,” sqaroi Dr.Samarxhiç.
Policia kroate dhe Prokuroria kanë nisur hetimet mbi rrethanat e aksidentit e shoferi i cili e ka pranuar se për momentin e ka zënë gjumi është arrestuar.
“Shoferi është arrestuar. Ai sot del para gjyqtarit për vepër penale të shkaktimit të aksidentit në qarkullimin rrugor. Dënimi për një vepër të tillë parashikohet deri në 15 vjet burg,” tha Drejtori i Policisë, Nikolla Milina.
Nga 67 pasagjerët që ishin në autobus, 15 ishin fëmijë. Për 44 të plagosurit është kujdesur personalisht Kryeministri i Kroacisë, Andrej Plenkoviç i cili ka asistuar edhe në transportin me helikopter nga Prishtina të Kryeministrit të Kosovës, Albin Kurti, deri në spitalin ku janë vendosur 44 të plagosurit.
Ndryshe, sot në Kosovë me vendim të Presidentes Vjosa Osmani është shpallur Ditë Zie.
