Tragjedia në minierën e Selishtës, pas 48 orësh nxjerren 3 trupat e pajetë

Pas 48 orësh janë nxjerrë të pajetë trupat e dy minatorëve dhe të një inxhinieri, pas ngjarjes tragjike e cila ndodhi në minierën e Selishtës, në Dibër.

Mësohet se pas alarmit të familjarëve për zhdukjen e tyre, forca të shumta policie kanë nisur kërkimet brenda minierës, ku në orët e para të mëngjesit të sotëm kanë arritur të nxjerrin trupat e pajetë të punëtorëve.

Policia ka gjetur fillimisht vetëm rrobat dhe sendet personale të viktimave, raporton BW, ndërsa kur janë futur brenda në galeri, rreth 100 metra, kanë hasur në trupin e pajetë të inxhinierit Ismail Hoxha.

Më pas, janë gjetur të pajetë edhe dy minatorët Fatos Cesku, 55 vjeç, dhe Rrushdi Rushiti, 29 vjeç. Sipas vëllait të inxhinierit, i cili bëri dhe denoncimin në polici për zhdukjen e tyre, viktimat dyshohet se i kanë mbytur gazrat brenda minierës.