Tragjedia “Shembja e skelës”/ Policia jep detaje, shpallet në kërkim Petrit Syla

Pas ngjarjes së rëndë që ndodhi dje në rrugën “Faik Konica” në Tiranë, ku shembja e skelës gjatë punimeve të një pallati 13 katësh la të vdekur 2 punëtorë dhe plagosi tre të tjerë, policia jep detaje nga hetimet.

Policia bënë ditur se ka arrestuar administratorin e firmës ‘’Xhimi”, Xhimi Tarushi, dhe drejtuesin teknik të firmës “Syla”, Ilir Bendo,  që po merreshin me punimet në atë pallat, ndërsa është shpallur në kërkim administratori i firmës skela “Syla”, Petrit Syla.

Policia bënë të ditur se për këtë ngjarje filloi procedimi penal për veprën penale “ Shpërdorimi i detyrës “, për punonjësit e Inspektoriatit të Punës Tiranë, pasi punonjesit nuk kanë ushtruar detyrën për kontrollin e masave të sigurisë në punë në pallatin ku ndodhi aksidenti, por asnjë fjalë për rikonstruksionin e fasadave si projekt i Bashkisë së Tiranës, e cila paguan kompani në të cilat detyrohen të punojnë shqiptarët edhe kur nuk ka as kushte minimale, dhe jeta e tyre është në rrezik. 

Ndryshe, dy viktmat e kësaj tragjedie që ndodhi dje ishin Ergys Brahimaj dhe Orjan Kodra ndërsa të plagosur mbetën Genti Bardhi, Euglidios Lika dhe Altin Marku, që mësohet se janë jashtë rrezikut për jetën.

Njoftimi

Ne përfundim të veprimeve hetimore, të kryera nga ana e Komisariatit të Policisë Nr. 1 në Tiranë nën drejtimin e Prokurorisë së Rrethit Gjyqësor Tiranë, u bë arrestimi në flagrancë i shtetasve për veprën penale “Shkelja e rregullave të mbrotjes në punë”, dhe konkretisht:

• Xh. T. 41 vjeç, me detyrë Drejtues Teknik i punimeve në firmën “Xhimi”.

• I. B. 44 vjeç, me detyrë Drejtues Teknik i sigurisë së punimeve në firmën skela “Syla”.

Si dhe u bë shpallja në kërkim e shtetasit P. S., me detyrë administrator i firmës skela “Syla”, për veprën penale “Shkelja e rregullave të mbrotjes në punë”.

Në rrugën “Faik Konica” në pallatin Nr. 2, firma “Xhimi” me administrator e Drejtues Teknik punimesh, shtetasin Xh. T., ka kryer punime në fasadën e jashtme të pallatit për veshjen me sistemin termoizolues (kapot). Po në këtë pallat, firma skela “Syla” me administrator shtetasin P. S. dhe Drejtues Teknik të punimeve e montimit të skeles Inxhinierin I. B., ka montuar skelën metalike për punimet në fasadë.

Si pasojë e punimeve në këtë pallat, rreth ores 15.00 është rrëzuar skela metalike, e për pasojë kanë humbur jetën shtetasit E.B., 31 vjeç, punëtor ndërtimi në firmën “Xhimi, si dhe shtetasi O.K, 36 vjeç, punëtor i firmes skela “Syla”.

Po nga rrëzimi i skelës janë plagosur dhe janë jashtë rrezikut për jetën, shtetasit G.B punëtor ndërtimi i firmës “Xhimi”, E.L dhe A.M, punëtor i firmës skela “Syla”.

Gjithashtu për këtë ngjarje filloi procedimi penal për veprën penale “ Shpërdorimi i detyrës “, për punonjësit e Inspektoriatit të Punës Tiranë, pasi punonjesit nuk kanë ushtruar detyrën për kontrollin e masave të sigurisë në punë në pallatin ku ndodhi aksidenti dhe po vazhdon puna për dokumentimin ligjor për këta punonjës.

Materialet do t’i kalojnë Prokurorisë së Rrethit Gjyqësor Tiranë, për veprime të mëtejshme.