Transformimi i Piramidës/ Marrëveshja, Bashkia e Tiranës merr projektin nga AADF

Kryetari i Bordit të Drejtorëve të Fondacionit Shqiptaro Amerikan të Zhvillimit, AADF, Michael Granoff, dhe Kryetari i Bashkisë Tiranë, Erion Veliaj, nënshkruan sot marrëveshjen e bashkëpunimit, e cila i hap rrugën fazës përfundimtare të rikonstruksionit të Piramidës.

Kryetari i Bordit të Drejtorëve të Fondacionit Shqiptaro Amerikan të Zhvillimit, Michael Granoff, e cilësoi projektin e Piramidës një mundësi unike, jo vetëm për Tiranën, por për gjithë vendin, që do të ndihmojë të rinjtë të aftësohen dhe të përgatiten për të ardhmen.

“Është një mundësi unike për ne, që në bashkëpunim me kryetarin Veliaj, të bëjmë diçka kaq transformuese, jo vetëm për qytetin e Tiranës, por besoj për të gjithë vendin. Nuk ndodh shpesh të ndryshojmë edhe formën, edhe substancën, për të bërë një transformim të tillë. Në rastin e projektit të Piramidës ne do t’i bëjmë të dyja: Ta kthejmë në një ambient për fëmijët tanë dhe fëmijët e fëmijëve tanë në të ardhmen. Jo vetëm për t’i ndihmuar ata të zhvillojnë talentet e tyre, por edhe në mënyrë që Tirana dhe Shqipëria t’i bashkohen botës më e kompletuar dhe të sigurohemi që fëmijët tanë të fitojnë aftësitë e duhura për të zhvilluar talentin e tyre në kontekst global,” tha Michael Granoff.

Ndërsa Kryetari i Bashkisë Tiranë, Erion Veliaj u zotua se Piramida do të ndryshojë brenda një viti e gjysmë.

“Sot është akti final, kur ne marrim në dorëzim projektin, pra e përkthejmë ëndrrën në një projekt të zbatueshëm. Brenda këtij viti do të kemi garën për të nisur punimet në Piramidën e Tiranës dhe me një supervizim të përbashkët, por edhe me një menaxhim e financim të përbashkët me AADF, do të shohim se si në një vit e gjysmë do të transformojmë hapësirën më të lakmuar të qytetit të Tiranës, në hapësirën që do të transformojë, besoj, të ardhmen e fëmijëve të këtij qyteti,” tha Erion Veliaj duke rikujtuar disa eksperienca shumë të mira me AADF e ku vend të veçant zë Pazari i Ri.