Transporti Urban refuzon të rinisë punën: Protokolli na çon drejt falimentit!
Ndonëse Qeveria vendosi që duke filluar nga nesër 24 Qershor, Transporti Publik do lejohet të rifillojë punën por me kushte dhe masa ndaj COVID-19 duke u bazuar tek një Protokoll Sigurie me 13 pika, Unioni Operatoreve të Transportit Publik refuzon të nisë punën pa u plotësuar më parë kushtet e vendosur prej tyre.
“Bazuar në fjalimin e fundit të Ministres së Shëndetësisë dhe Mbrojtjes Sociale po Ju bëjmë me dije se Unioni i Operatoreve të Transportit Publik nuk mundet të rifilloi shërbimin për sa kohë nuk është plotësuar asnjë nga pikat e kërkuara. Me anë të kësaj deklarate përgënjështrojmë Ministren e Shëndetsisë, e cila tha: “Hiqen kufizimet për transportin publik”.
Për sa kohë është në fuqi Urdhri i Ministres së Energjisë dhe Infrastrukturës Nr.169 dt.5/6/2020 operatorët e transportit publik nuk e kanë të mundur të përballojnë kostot e respektimit të këtij protokolli, si finaciare ashtu edhe ligjore,” thekson Unioni i Operatoreve të Transportit Publik pas njoftimit të ministres së Shëndetësisë, Ogerta Manastirliu për lejimin e punës së Transportit Publik. Dhe jo vetëm kaq!
Kryetari i shoqatës, Eneo Sulejmanajk, sqaroi se zbatimi i 13 pikave të vendosura nga Ministria e Shëndetësisë do t’i çonte ata drejt falimentit ndërsa punën mund t’ia nisin vetëm nëse ndryshon ky protokoll:
“Komiteti i Ekspertëve nuk është vendimmarrëse, por institucion këshillues. Nëse e dëgjuam me kujdes, ministrja tha se protokolli i sigurisë mbetet në fuqi. Këtë kundërshtojmë, pasi shtohen kostot. Ky vendim duhet të bëhet zyrtare nga ministrja e Infrastrukturës, pra duhet të vijë në formë shkresore por jo përmes ‘Facebook’. Duhet të ndryshojnë disa nga kërkesat tona. Ne duam që të nisë sa më shpejt shërbimi. Protokolli ka kosto shtesë. Po kush i mbulon këto kosto? Ne na kanë ardhur 13 pika. Ne mund të zbatojmë në transportin ndërqytetas është e realizueshme. Nëse në transportin qytetar është më e vështirë. S’mund të ruhet distanca mes qytetarit dhe faturinos. Ne nuk na dalin shpenzimet me këtë 50 ulje të fluksit. Nuk kemi kapacitete. ne do të dalim në një deklaratë për shtyp. Por me shumë siguri them se do të ketë dhe një protestë,” tha Sulejmanaj.
Ndryshe, ky është Protokolli i Sigurisë pë Transportin Publik:
- Numri i udhëtarëve do të lejohet me kapacitet 70%.
- Ulja e udhëtarëve do të jetë në mënyrë diagonale.
- Drejtuesi i mjetit duhet të ketë maskë mbrojtëse dhe doreza.
- Udhëtarët detyrimisht me maska dhe doreza.
- Hipja dhe zbritja do të bëhet në dyer të ndryshme.
- Nëse udhëtari shfaq shenja të Covid-19, shoferi do duhet të njoftojë 127.
- Duhen dezinfektuar makinat.
- Gjatë udhëtimit duhet ajrosur makina.
- Në terminal duhet zbatuar distancimi.
- Terminali të dizinfektohet.
- Në mjete të vendosen postera kundër përhapjes covid-19.
- Të respektohen masat e higjienës.
- Masat e parashikuara do të kontrollohen nga kompetencat përkatëse
