Trazira në Pazar të Ri, ndeshja me Crvena Zvezdën ndërpritet në minutën e parë

Ndeshja e Pazarit të Ri me Crvena Zvezdën e Beogradit në çerekfinalen e Kupës së Futbollit të Serbisë, e cila filloi në orën 14:45, u ndërpre në minutën e parë, për shkak të incidenteve në tribuna.

Tifozët e Pazarit të Ri, siç raporton Mozzart sport, gjuajtën tifozët mysafirë me topa të mjeteve piroteknike ndërsa nga tribunat dëgjoheshin brohoritje “Ky është Sanxhaku”.

Tifozët e Crvena Zvezdës, “Delije”, të njohur si më të dhunshmit në Evropë që financohen nga trafikant të armëve dhe drogës, u përpoqën të përballeshin me ekipin vendas që po qëllonte drejt tyre, ndërsa konflikti shpërtheu me policinë dhe ndeshja u ndërpre për shtatë minuta.

Në “lindje” ku ndodhen tifozët e Crvena Zvezdës, si zonë tampon kanë katër sektorë bosh, por pavarësisht kësaj pati trazira.

Për fat të mirë, situata në tribuna u qetësua dhe loja rifilloi në minutën e tetë.

Ndryshe, ndeshjen e çerekfinales së Kupës së Serbisë Pazari i Ri – Crvena Zveda janë duke e ndjekur rreth 7.000 tifozë.