Tre kandidatë për Kryeprokuror, ja kush e sfidon Arta Markun

Pas Prokurorit të Krimeve të Rënda, Olsian Çela, kandidaturën për vendin e Prokurorit të Përgjithshëm sot e kanë shpallur edhe Fatjona Memçaj dhe Lulzim Alushaj.

Ndryshe, gara për Prokuror të Përgjithshëm u hap më 29 mars dhe deri më tani janë tre kandidatë që kanë aplikuar dhe kanë mbetur vetëm 9 ditë nga përfundimi i afatit.

Sipas rregullores së miratuar nga KLP-ja, një prokuror, që të kandidojë në krye të Prokurorisë së Përgjithshme, duhet që të ketë 15 vjet përvojë pune si jurist i spikatur. Të jetë diplomuar në Shkollën e Magjistraturës ose të ketë gradë shkencore në drejtësi. Të mos ketë mbushur moshën e daljes në pension. Të mos ketë mbajtur gjatë 10 viteve të fundit, para dorëzimit të shprehjes së interesit për Prokuror të Përgjithshëm, funksione politike në administratën publike. Të mos ketë mbajtur gjatë 10 viteve të fundit pozicione drejtuese në partitë politike. Të mos ketë qenë anëtar, bashkëpunëtor ose i favorizuar i ish-Sigurimit të Shtetit. Të mos ketë qenë dënuar më parë me vendim gjyqësor të formës së prerë për kryerjen e një vepre penale. Të mos ketë qenë bashkëpunëtor, informatorë ose agjent i Shërbimeve të Inteligjencës dhe të mos ketë masë disiplinore në fuqi.