Tre të vdekur nga të shtënat në qendër të Parisit

Tre persona u vranë dhe disa u plagosën sot nga të shtënat në qendër të Parisit, bëjnë të ditur autoritetet franceze.

Numrin e të vdekurve e ka konfirmuar Laure Beccuau, prokurore në Paris, raporton RFE.

“Janë tre të vdekur, një person në kujdes intensiv dhe dy persona me lëndime serioze. Po ashtu, i dyshuari që është arrestuar, është i lënduar kryesisht në fytyrë,” tha prokurorja në vendngjarje.

Siç raporton BBC-ja, i dyshuari është një 69 vjeçar.

Personi i arrestuar, sipas televizionit francez BFM TV, ishte i njohur për autoritetet franceze dhe kishte sulmuar një kamp emigrantësh një vit më parë.

Motivet e personit të armatosur mbeten të paqarta, me dy nga katër të plagosurit në gjendje të rëndë, thanë zyrtarët francezë.

Incidenti i të shtënave të së premtes në Paris ndodhi në një qendër lokale kurde, u tha gazetarëve kryebashkiaku i qarkut të 10-të të qytetit.

Policia e Parisit në Twitter tha se një operacion lidhur me këtë rast është duke vazhduar dhe i ka kërkuar qytetarëve që të shmangin frekuentimin në këtë zonë.

“Është panik total, ne jemi mbyllur brenda,” tha një pronare e një dyqani për agjencinë e lajmeve AFP.

Dëshmitarja tha se kishte dëgjuar shtatë ose tetë breshëri të shtënash.

Sipas Agjencisë së lajmeve, Associated Press, prokurorët e Antiterrorizmit janë në kontakt me hetuesit, por RFE shton se nuk kanë dhënë indikacione se ka ndonjë shenjë të një motivi terrorist në këtë fazë.