Tregjet aziatike të aksioneve shënojnë rënie

Tregjet aziatike të aksioneve sot kanë shënuar rënie si pasojë e përshkallëzimit të luftës tregtare në mes të Shteteve të Bashkuara dhe Kinës.

Presidenti amerikan, Donald Trump ka njoftuar të premten për rritje të tarifave në të gjitha importet kineze të nisura drejt SHBA-së.

Ky njoftim ka ardhur pasi Pekini është shprehur se do të vendosë masa të reja dhe do të rrisë tarifat në importet amerikane në Kinë.

Tregu i aksioneve në Hong Kong ka rënë për 3.2 për qind, në Shangai 1.3 për qind, dh në Japoni 2.3 për qind.

Sot valuta kineze, yuan tregtohet 7.5 dollar.

Rënia e vlerës së kësaj valute, ka shtyrë më herët gjatë këtij muaji SHBA-në që ta konsiderojë Kinën “manipuluese të valutës”, duke shtuar tensionet në mes të të dyja shteteve, raporton RFE.

Dy ekonomitë më të mëdha në botë janë përfshirë në një betejë tregtare nga viti i kaluar, duke vendosur tarifa tregtare ndaj produkteve të njëra-tjetrës në vlerë të miliarda dollarëve.

Presidenti Trump ka akuzuar Kinën për praktika të padrejta tregtare dhe vjedhje të pronës intelektuale.

Mirëpo në Kinë, ekziston bindja se SHBA po synon t’i zvogëlojë këtij shteti zhvillimin që po përjeton.