Tregtarët e Kosovës rrisin furnizimin me prodhimet nga Serbia

Kompanitë tregtare në Kosovë kanë rritur furnizimin dhe blerjen e prodhimeve nga Serbia. Kështu, në gjashtëmujorin e parë të këtij viti importi nga Serbia është rritur për nëntë milionë euro përkatësisht 211.532.000 euro.

Kjo ndodhë edhe pse eksporti nga Kosova në Serbi ka shënuar ulje në gjashtëmujorin e parë dhe arsyeja e vetme ngelet politika shoviniste e Beogradit ndaj çdo produkti kosovar. Kështu në gjashtëmujorin e parë të këtij viti, kompanitë nga Kosova kanë eksportuar mall në Serbi në vlerë prej 15 milionë euro që është pesë milionë euro më pak se në gjashtëmujorin e parë të vitit 2017, theksojnë të dhënat e Agjencisë kosovare të Statistikave.

Ndërkohë, sipas këtyre statistikave, janë vetëm 82 milionë euro mallëra të importuara nga Shqipëria në Kosovë.

Deficiti tregtar, sipas të dhënave të Agjencisë kosovare të Statistikave, në muajin maj është rritur për 13 % krahasuar me muajin të vitit të kaluar.

Sipas një përllogaritje për 10 vitet e fundit, zyrtarisht, nga Serbia në Kosovë janë importuar mallra me vlerë rreth tre miliardë euro, pa llogaritur këtu mallrat kontrabandë që i bëjnë një konkurrencë serioze sasisë së mallrave që futen në mënyrë të ligjshme në Kosovë.