Tregu i mbushur me makina të vjetra, rreth 73% e autoveturave janë me moshë mbi 15 vjeçare

Për periudhën janar-qershor 2024, sipas të dhënave Drejtorisë së Përgjithshme të Shërbimit të Transportit Rrugor, totali i mjeteve që rezultojnë me status “aktiv” ose “të çregjistruara përkohësisht” në regjistrin kombëtar është 914,925 mjete. Të regjistruara për janar -qershor 2023 ishin gjithsej 828.306 mjete.

Nga totali i mjeteve për janar-qershor 2024, raporton Monitor, numri i autovetuarave në regjistrin kombëtar arriti në 738.299. Krahasuar me të njëjtën periudhë të vitit të kaluar numri i autoveturave u shtua 11%.

Për 6 mujorin e parë të 2024-s, autoveturat me moshë mbi 15 vite përbëjnë 73% të numrit gjithsej të autoveturave me status “aktiv” ose “të çrregjistruara përkohësisht”. Numri i autoveturave për grupin mbi 15 vjet për janar-qershor ishte 541,210 autovetura sipas të dhënave të DPSHTRR-së. Krahasuar me të njëjtën periudhë numri i tyre është rritur 11%.

Numri i autoveturave 9 deri 15 vjeçare për janar-qershor 2024 ishte 149,677 autovetura. Numri i tyre u shtua rreth 2%. Në flotën e autoveturave ato zunë 20% të totalit.

Ndërsa numri i autoveturave të moshës 5 deri 8 vite për janar-qershor 2024 ishte 27,672 autovetura apo 57% më shumë se në 2023. Në flotën e autoveturave ato zunë rreth 4% të totalit për periudhën janar-qershor 2024.

Autoveturat e reja, me moshe nga 0 deri 4 vite ishin 19,730. Krahasuar me vjet numri i tyre është rritur 33%. Në totalin e makinave të regjistruara ato zenë 2,6%.

Në flotën e autoveturave, të tipologjisë me kambio manuale zunë pjesën më të madhe 56,2% të totalit të tyre që rezultojnë me status “aktiv” ose “të çregjistruara përkohësisht” për 6 mujorin e parë të 2024-s.

Numri më i lartë i mjeteve rrugore është regjistruar në qarkun e Tiranës duke zënë 35% ndaj mjeteve rrugore gjithsej të regjistruara në vend. Më pas numri më i lartë i autoveturave për janar-qershor 2024 ishte në Durrës me 102,290 autovetura apo rreth 14% të totalit. E ndjekur nga qyteti i Fierit ku autoveturat zënë 9% të totalit në rang vendi dhe më pas në Shkodër ku zënë 7%.

Sipas llojit të markës, raporton Monitor, në 6 mujorin e parë të 2024-s, kryesuan autoveturat e markës “volkswagen” me 140,130 të tilla apo sa 19% e totalit të autoveturave të regjistrit kombëtar. E ndjekur më pas nga marka mercedez benz me një flotë prej 133,137 autoveturash duke zënë 18% të totalit./