Tremujori i dytë, ASK: Ekonomia e Kosovës u rrit me 4.58%

 Të dhënat e Agjencisë së Statistikave të Kosovës për Prodhimin e Brendshëm Bruto në tremujorin e dytë të vitit 2025, sipas aktiviteteve ekonomike dhe me qasjen e shpenzimeve, tregojnë se PBB ka shënuar rritje reale prej 4.58% krahasuar me periudhën e njëjtë të vitit 2024.

Sipas raportit të ASK-së, këto të dhëna pasqyrojnë një performancë pozitive të ekonomisë së Kosovës në tremujorin e dytë të këtij viti ku rezulton rritje në disa sektorë kyç të ekonomisë:

Aktivitetet financiare dhe të sigurimit 8.79 për qind, aktivitetet profesionale, teknike dhe të shërbimeve administrative 4.27 për qind, ndërtimtaria 4.15 për qind, industria përpunuese 3.34 për qind, tregtia, transporti, akomodimi dhe shërbimet ushqimore 3.62 për qind, bujqësia, pylltaria dhe peshkimi 2.98 për qind, informacioni dhe komunikimi 2.38 për qind, dhe, aktivitetet e pasurive të paluajtshme 0.44 për qind.

Në anën tjetër, rënie u regjistrua tek industria nxjerrëse, energjia elektrike, gazi, furnizimi me ujë dhe menaxhimi i mbeturinave, me një tkurrje prej -6.79 për qind. 

Nga ana e shpenzimeve, rritjen e PBB-së e kanë ndikuar: Eksporti i mallrave dhe shërbimeve 10.42 për qind, importi i mallrave dhe shërbimeve 13.23 për qind, formimi i kapitalit bruto për qind 10.99 për qind, dhe konsumi final i ekonomive familjare dhe i institucioneve jofitimprurëse që i shërbejnë ekonomive shtëpiake 3.91 për qind.

Në fund, Agjencia e Statistikave të Kosovës thekson se këto të dhëna pasqyrojnë një performancë pozitive të ekonomisë së Kosovës në tremujorin e dytë të këtij viti, me rritje të dukshme në sektorët e shërbimeve dhe investimeve.