Tri ditë zie në Tetovë për 14 viktimat e zjarrit

Ka arritur në 14 numri i viktimave në Tetovë nga zjarri që ka përfshirë mbrëmjen e së mërkures spitalin mobil për trajtimin e personave të sëmurë me sëmundjen COVID-19, ka bërë të ditur Ministria e Shëndetësisë e Maqedonisë së Veriut.

“Në momentin e shpërthimit të zjarrit kishte gjithsej 26 pacientë në qendrën COVID-19; 12 të tjerët po trajtohen në spitalin e Tetovës dhe janë jashtë rrezikut. Asnjë punonjës shëndetësor nuk u lëndua rëndë, po ka disa me lëndime të lehta”, thuhet në njoftimin e Ministrisë së Shëndetësisë.

Paraprakisht, kjo është bërë e ditur nga Prokuroria Publike e Shkupit, e cila në bashkëpunim me Prokurorinë Publike të Tetovës kanë kryer gjatë natës hetime në vendin e ngjarjes.

Për shkak të dëmtimeve të rënda, disa viktima do t’u nënshtrohen analizave të ADN-së.

“Në bashkëpunim me pjesëtarët e Ministrisë së Brendshme, po vazhdojnë hetimet për zbardhjen e rastit. Prokurorët kanë lëshuar urdhër për identifikimin e trupave të 14 personave të vdekur nga zjarri. Disa nga të vdekurit do të kenë nevojë për analiza të ADN-së për të përcaktuar identitetin e tyre”, thuhet në njoftimin e Prokurorisë.

Këshilli Komunal i Tetovës ka shpallur tre ditë zie në këtë qytet, ndërsa ka thënë se do t’i ndihmojë financiarisht të gjitha familjet e viktimave për të mbuluar shpenzimet e varrimit.

Incidenti ka ndodhur të mërkurën rreth orës 21:00. Zjarri besohet të jetë përhapur nga shpërthimi i bombolave të gazit apo oksigjenit. Ekipet e zjarrfikësve kanë shkuar në vendin e ngjarjes pesë minuta pas shpërthimit të fuqishëm.

Kryetarja e Komunës së Tetovës, Teuta Arifi, ka thënë të enjten se institucionet po bëjnë gjithçka të mundur për zbardhjen sa më të shpejtë të ngjarjes, por pa dhënë detaje mbi shkaqet e kësaj tragjedie.

“Është fatkeqësia më e madhe, e cila ka prekur qytetin tonë. Është e dhimbshme dhe ne të gjithë mund të flasim vetëm me dhimbje… Unë jam në kontakt me të gjitha autoritetet që janë të kyçura në procesin e hulumtimit dhe procesin e zbardhjes së rastit. Çdo informatë që e marr në mënyrë të verifikuar, të njëjtën do t’ju komunikoj me qëllim që të gjithë të jeni të informuar”, ka deklaruar Arifi.

E pyetur nëse shpërthimi ka lidhshmëri me një incident të para dy javëve, kur ishin dëmtuar instalimet e oksigjenit në këtë spital mobil, Arifi tha se hetimet do të tregojnë shkaqet e incidentit.

Ky spital ka nisur të ndërtohet në fillim të vitit me vonesa të shumta, ndërsa nga mesi i prillit, Drejtoria e Spitalit të Tetovës ka ngritur shqetësimet mbi disa lëshime nga firma ndërtuese, nga e cila ka kërkuar mënjanimin e tyre, por ende nuk dihet nëse ato janë mënjanuar.

Në Tetovë, të mërkurën deri në mesnatë kanë qëndruar edhe kryeministri maqedonas, Zoran Zaev, dhe shumë anëtarë tjerë të Qeverisë, të cilët kanë marrë pjesë në një mbledhje të shtabit të krizës.

“Tragjedi e madhe ndodhi në qendrën COVID-19 në Tetovë. Zjarri është shuar, por janë shuar edhe shumë jetë njerëzish…shkaqet e zjarrit do të përcaktohen, për këtë autoritetet gjyqësore janë në terren. Kjo është një ngjarje vërtet tragjike dhe mund t’ju siguroj se i gjithë kreu shtetëror është i përkushtuar për zgjidhjen e shpejtë të kësaj situate”, ka shkruar kryeministri Zoran Zaev në rrjetin social, Facebook.

Lidhur me ngjarjen kanë reaguar edhe partitë opozitare.

VMRO DPMNE-ja ka shprehur keqardhje për incidentin por ka kërkuar edhe përgjegjësi nga institucionet.

“Institucionet duhet të hetojnë plotësisht shkaktarët e tragjedisë dhe të përcaktojnë përgjegjësinë, e cila nuk duhet të mungojë. Duke kuptuar plotësisht revoltën e qytetarëve dhe njerëzve të Tetovës. I bëjmë apel ministrit Venko Filipçe dhe kryeministrit Zoran Zaev në këto momente të vështira që të mos fshihen nga publiku dhe të dalin me të dhëna dhe vlerësime të sakta të situatës”, thuhet në reagimin e VMRO DPMNE-së.

Kryetari i Komunës së Gostivarit, Arben Taravari, njëherit sekretar i përgjithshëm i Aleancës për Shqiptarët, në një postim në Facebook, ka kërkuar dorëheqjen e qeverisë duke e fajësuar për këtë tragjedi të rëndë.

Presidentja e Kosovës, Vjosa Osmani, ka ngushëlluar familjet, presidentin e Maqedonisë së Veriut, Stevo Pendarovski dhe kryetaren e Tetovës, Teuta Arifi për viktimat nga zjarri në Tetovë.

“E prekur thellësisht nga aksidenti tragjik në Spitalin Covid të Tetovës, ju përcjell ngushëllimet e mia familjeve që humbën më të dashurit, presidentit të Maqedonisë së Veriut, Stevo Pendarovski si dhe kryetares së Tetovës, Teuta Arifi”, është cituar të ketë thënë Osmani sipas Presidencës.

Edhe kryeministri i Kosovës, Albin Kurti i ka shprehur ngushëllime përmes telefonit kryetares Arifi si dhe ka treguar gatishmëri për ndihmë.

Ministri i Mbrojtjes i Kosovës, Armend Mehaj, përmes një postimi në rrjetin social Facebook, tha se ka biseduar me Ministren e Mbrojtjes të Maqedonisë së Veriut, Radmilla Shekerinska, dhe se i ka ofruar të gjitha kapacitetet e FSK-së për menaxhimin dhe tejkalimin e tragjedisë në spitalin mobil të Tetovës./RFE/