Triporti në Vlorë, Balluku: U miratua koncesioni, do të jetë i integruar

Triporti në Vlorë do të jepet me koncesion. Ministrja e Energjisë dhe Infrastrukturës Belinda Balluku njoftoi miratimin e kontratës së koncesionit të partneritetit publik-privat. Sipas Ballukut Triporti do të jetë një port i integruar.

Gjithashtu në mbledhjen e fundit të qeverisë është miratuar edhe vendimi për shtimin e huasë për aksin Qukës – Qafë Plloçë.

“Shtimi i huasë për aksin Qukës – Qafë Plloçë 56 milionë e 800 mijë dollar, të cilat do të vihen me njëherë në dispozicion të këtij projekti për të nisur menjëherë ndërtimin me 5 ura, dy në segmentin 1 dhe 3 në segmentin dy si dhe mbrojtjen e mirëmbajtjen e skarpateve, rrugët e aksesit dhe barrierat e sigurisë. Gjithashtu bëhet fjalë që këtij projekti ti shtohet edhe komplementimi i tuneleve me pajisjet elektronike, përfshirë gjithë sinjalistikën që urat dhe tunelet do të ndërtohen.

Një tjetër projektvendim i rëndësishëm që u aprovua ishte miratimi i kontratës së koncesionit të partneriteti publik-privat, për projektin “Ndërtimi dhe mirëmbajtja e Portit të integruar në Triportin Vlorë”. Ky është një projekt që e kemi thënë prej kohësh, që Triporti do jetë porti më i ri modern i ndërtuar në zonën e Vlorës, i cili do jetë një port i integruar. Sot, ka vetëm shërbimet e peshkimit por në të ardhmen do të ketë të gjitha shërbimet komerciale, bazuar në kalatat e reja që do ndërtohen atje. Sigurisht duke akomoduar dhe pjesën e peshkimit, por mbi të gjitha edhe mirëmbajtjen e anijeve. Një pjesë e munguar deri më sot, që shpesh peshkatarët duhet t’i drejtoheshin Italisë për ta bërë këtë.

Është një nga kontratat më të mira të partneritetit publik – privat që ne kemi nënshkruar dhe do ta vëmë në zbatim menjëherë pas zbardhjes në fletoren zyrtare, pasi parashikohet që ky financim të fillojë të paguhet nga shteti shqiptar vetëm në momentin kur projekti do ketë përfunduar së ndërtuari dhe në nisjen e parë të operimeve.

Nga të ardhurat që vetë porti do të krijojë, do të jetë momenti që do fillojë të paguhet e gjithë shuma e këtij projekti. Deri atëherë Qeveria shqiptare nuk do të ketë asnjë detyrim financiar”, deklaroi ministrja./Monitor/