Tritol makinës së kreut të PD Vau i Dejës, Berisha: Akt i rëndë i terrorizmit shtetëror!
Vendosjen e tritolit në makinën e Kryetarit të PD Dega Vau i Dejës, Kryetari i Partisë Demokratike, Sali Berisha, e cilësoi si një akt të rëndë të terrorizmit shtetëror kundër Bernard Ndrecës, ndërsa e bëri përgjegjës Kryeministrin Edi Rama, me të cilin akt terrorist, ai inauguroi çeljen e fushatës së tij elektorale.
“Sot në mëngjes u krye një akt i rëndë i terrorizmit shtetëror kundër Bernard Ndrecës, kryetar i PD për Vaun e Dejës, me qëllim eliminimin e tij fizik.
Bernard Ndreca është një qytetar shembullor, e tillë është familja e tij.
Terroristë shtetërorë, sipas regjistrimit të kamerave, kanë vendosur tritolin në makinën e tij.
Bernardi, tek nisej për në punë, pas disa metrash përballet me një eksplozion të tmerrshëm që i shkatërron pjesën e përparme të makinës.
Por fatmirësisht, vetë ai shpëtoi nga ky atentat i mirëfilltë politik.
Me këtë akt terrorist, Edi Rama inauguron çeljen e fushatës së tij elektorale.
Ky përbën një krim të shëmtuar, përbën një akt të pashembullt në historinë e zgjedhjeve kur një drejtues kryesor i një dege të PD-së, sulmohet apo ndaj tij organizohet një atentat për likuidimin e tij,” tha Sali Berisha duke bërë përgjegjës direkt Edi Ramën dhe ministrin e familjes, Çuçi!
“Vau i Dejës dhe mbarë Shqipëria, janë sot më të vendosur se kurrë në fitoren e këtyre zgjedhjeve.
Unë kam biseduar në telefon me Bernardin, me deputetin Zef Hila dhe u shpreh atyre mbështetjen dhe solidaritetin tim të plotë.
Gjithashtu, dënoj këtë krim të shëmtuar.
Specialistët e tritolit janë të gjithë nën kontrollin qeveritar shtetëror. Pasi dështuan me të gjitha mënyrat në Vaun e Dejës, së fundmi zgjodhën atë më ekstremen, por edhe me këtë dështuan.
Duke dënuar edhe njëherë me ashpërsinë më të madhe këtë akt të narkoshtetit, bëj përgjegjës direkt Edi Ramën dhe ministrin e familjes, Çuçi, pasi policia e Vaut të Dejës dhe shefi i komisariatit sillen si një seksion i PS-së.
Me sjelljet e tyre militanteske, të gjitha pistat dhe dyshimet shkojnë se ata janë dorës dhe organizatorë të këtij akti,” tha Kryetari i Partisë Demokratike, Sali Berisha, duke i bërë thirrje demokratëve të Vaut të Dejës dhe mbarë Shqipërisë:
“Të vazhdojmë këtë betejë, se ky akt i sotëm është dëshmi e një përpëlitje të një organizate kriminale të kryesuar nga Edi Rama, që ka humbur çdo shpresë dhe nuk ngurron as aktet më ekstreme për të terrorizuar dhe marrë jetë njerëzish.
Koha e monizmit merr fund më 14 maj. Qytetarët e Vaut të Dejës do votojnë Zef Hilën dhe Bernard Ndreca do udhëheqë një nga fushatat më të suksesshme në Shqipëri.”
Ndryshe, ky shpërthim vjen një ditë pasi kandidatët për Këshillin Bashkiak të PD-së së Vulës në Vaun e Dejës kanë dalë në mbështetje të Zef Hilës, si kandidat i Rithemelimit për kryetar të bashkisë në zgjedhjet e 14 majit, duke e cilësuar Klomentina Drinin si kandidaturë personale e nxjerrë në kundërshtim me vullnetin e demokratëve të Vaut të Dejës; Akt i cili u konsiderua rezultat i përpjekjeve të Bernard Ndrecës për të bashkuar Partinë Demokratike të përçarë nga bedelët e Lulzim Bashës!
Dhe, deri sa policia doli në vendin e ngjarjes dhe reagoi për këtë akt kriminal, bedelët që nuk e duan Partinë Demokratike të bashkuar, vazhdojnë dhe heshtin!
Ndryshe, në zgjedhjet për Kryetar të Partisë Demokratike të organizuara nga Rithemelimi, Bernard Ndreca u zgjodh Kryetar i PD Dega Vau i Dejës, duke marrë 531 vota nga 760 anëtarë të Partisë Demokratike sa morë pjesë në votim.
