Tritol ndaj kryetarit të PD Vau i Dejës, Berisha: Heshtja kriminale e Ramës faktoi se ai qëndron pas aktit terrorist!

Me heshtjen e tij kriminale 48-orëshe, Edi Rama faktoi se qëndron prapa atentatit ndaj Kryetarit të PD Dega Vau i Dejës, Bernard Ndreca, tha sot Kryetari i Partisë Demokratike, Sali Berisha, në seancën plenare të Parlamentit të Shqipërisë ndërsa dënoi vendimin e KQZ si një nga aktet më të turpshme ku mundi, djersa dhe taksat e 620 mijë qytetarëve që votuan PD-në, grabiten nga një grup, pengje të Edi Ramës.

“Sot, seanca duhej t’i kushtohej aktit të shëmtuar terrorist shtetëror, me të cilin partia terroriste e krimit, u shfaq me gjithë shëmtinë e saj në Paçram të Vaut të Dejës, ku vendosi tritol për t’i marrë jetën një politikani të ri, një qytetari shembullor, bir të një familje shembullore.

Nuk ka diskutim se prapa çdo atentati politik, qëndron politik. Në mënyrën më të shëmtuar e faktoi këtë Edi Rama me heshtjen e tij kriminale 48-orëshe.

U godit për t’i marrë jetën një politikan i ri, mbi të cilin janë vetëm ëndrrat dhe idealet më fisnike të njeriut, të atdhedashurisë, të besimit te liria.

U godit si kundërshtar politik, në mënyrën më kriminale, më të shëmtuar dhe natyrisht ata të cilët panë se shpëtoi, nuk guxuan dot të shqipërojnë një fjalë të vetme dënimi, solidariteti me familjen, përkundrazi u strukën në labirintet e krimit të tyre të shëmtuar. Dhe ky është Edi Rama.

Nuk ka kryeministër në botë nëse do ishte dorëjashtë, që nuk do dënonte në mënyrën më të fuqishme një akt të tillë, të dokumentuar mirëfilltas si krim politik, përveç atij që e ka porositur, përveç atij që është rikthyer te genet e etërve të tij.

Unë i shpreh solidaritetin tim më të madh Benard Ndrecës, familjes, demokratëve të Vaut të Dejës.

Dënoj heshtjen kriminale të Edi Ramës që faktoi se qëndron me këtë heshtje prapra këtij akti të vërtetë të terrorizmit shtetëror,” tha Sali Berisha nga foltorja e parlamentit duke dënuar ndarjen e financimit të partive që dje bëri KQZ ndërsa siguroi shqiptarët se PD-në po e financon fryma e fitores.

“Një nga aktet më të turpshme, më të shëmtuara është se mundi, djersi dhe taksat e 620 mijë qytetarëve që votuan PD-në, grabiten nga një grup, pengje të Edi Ramës.

Jo pak, por janë 2 milionë dollarë, 1 milionë dollarë është vetëm fushata.

Përfaqësuesit e 620 mijë votuesve nuk marrin asnjë qindarkë.

Kjo tregon fytyrën e shëmtuar të këtij regjimi. Ky tregon keqpërdorimin e dyshes famëkeqe Alibasha-Brava.

Por asgjë nuk e pengon PD-në. Ajo do financohet nga kontributet vullnetare të anëtarëve të saj.
Së shpejti do njoftojmë një rregullore për përballimin e fushatës,” tha Kryetari i Partisë Demokratike, Sali Berisha, duke përfunduar:

“PD-në po e financon fryma e fitores. Ka një frymë fitoreje kudo që shkon.

Ju e shihni se Erion Veliaj ngarkon në furgona punonjës të policisë dhe përgatit takimet vetëm me punonjës të bashkisë.

Edi Rama e hapi fushatën vetëm me nomenklaturën e tij të korruptuar, se edhe ai ka frikë nga qytetarët.
Pra, janë në një dëshpërim të thellë.

Forca politike e idealeve të lirisë, e transformimeve epokale të Shqipërisë është në një ngjitje vertikale. Janë të pashpresë.”