Trump: dënoj çdo lloj racizmi dhe veprimi me dhunë
Ndërsa zyrtarët në qytetin amerikan Washington dhe në shtetin fqinjë, Virginia, po marrin masa për përvjetorin e parë të një mitingu të nacionalistëve të bardhë, që përfundoi në dhunë vdekjeprurëse, Presidenti Donald Trump bëri thirrje për unitet:
“Duhet të qëndrojmë së bashku si komb. Unë dënoj çdo lloj racizmi dhe veprime me dhunë. Paqe për të gjithë amerikanët!”, – shkroi në Twitter Presidenti, ndërsa ndodhet në klubin e tij të golfit në shtetin e New Jersey, raporton VOA.
Presidenti Trump shtoi se ai “ka luftuar” për përmirësimin e jetës për të gjitha pakicat dhe u zotua se “Nuk do të pushoj kurrë së luftuari për të gjithë amerikanët!”.
Përgjigja e presidentit ndaj mitingut të vitit të kaluar në Sharlotsville të Virginias, shkaktoi kritika të mëdha kur ai deklaroi nga dhoma e konferencave për shtyp të Kullës Trump, se “të dyja palët në miting ishin njerëz normalë.”
Kryetarja e Bashkisë së Washingtonit, Muriel Bowser, tha të enjten se kishte nënshkruar një urdhër për shkallëzimin e operacioneve të emergjencës në përgatitje të mitingut që është në plan të mbahet të dielën në Sheshin Lafayette, një park përballë Shtëpisë së Bardhë. Leje për t’u grumbulluar në park, si dhe pranë tij, kanë edhe anti protestuesit.
Shefi i Policisë së Washingtonit, Peter Newsham, tha se armët e zjarrit do të jenë të ndaluara në mitingjet, edhe për personat që kanë leje për të mbajtur armë.
Guvernatori i Virginias, Ralph Northam dhe zyrtarë të qytetit të Sharlotsvillit njoftuan se gjendja e emergjencës do të jetë në fuqi nga dita e premte, deri të dielën në qytet, si dhe në pjesë të Virginias Veriore, pranë Washingtonit.
Zyrtarët thanë se rreth 700 oficerë policie do të jenë në krye të detyrës gjatë fundjavës, “të përgatitur plotësisht prë të vepruar”, për të parandaluar dhunën.
Në gusht të vitit 2017, protesta e shoqëruar me parulla raciste dhe simbole naziste shkaktoi vdekjen e një personi dhe plagosjen e 19 të tjerëve. Këtë vit, supremacistët e bardhë planifikuan një protestë të dytë për ta shënuar këtë ngjarje, këtë radhë në Washington.
Në protestën e 12 gushtit të vitit të kaluar, policia e qytetit të Sharlotsvillit, ajo shtetërore dhe Garda Kombëtare ishin të pranishme në statujën ikonë të Gjeneralit të forcave të konfederatës, Robert E. Lee, epiqendra e protestës.
Zyrtarisht, nacionalistët e të djathtës ekstreme ishin mbledhur për të protestuar kundër heqjes së kësaj statuje. Protesta pati një përfundim tragjik. Një makinë shtypi protestuesit antifashistë, duke vrarë aktivisten Heather Heyer dhe duke plagosur shumë të tjerë.
3 Disa ditë pas protestës tragjike, autoritetet mbuluan statujën me një qese të zezë plastike, por sot statuja vazhdon të jetë aty. Mgjithatë, janë bërë disa ndryshime, pothuajse gjithë administrata e qytetit të Sharlotsvilit tani është e re. Universiteti i Virxhinias reduktoi hyrjen në mjediset e tij në datat 11 dhe 12 gusht, sepse administrata e tij po përpiqet të shmangë protestat e mundshme.
