Trump dhe Putin takim në Osaka

Presidenti amerikan Donald Trump dhe ai rus, Vladimir Putin, do të takohen Samitin e 20 vendeve më të industrializuara, G20, që do të mbahet më 28 qershor të Osaka të Japonisë, ka konfirmuar ndihmësi i Kremlinit, Yuri Ushakov, raporton RFE.

Takimi mes dy liderëve do të zhvillohet në kohën e rritjes së tensioneve rreth Teheranit. Presidenti Trump ka kërcënuar me sulme hakmarrëse ndaj Iranit, pasi e ka fajësuar atë për kryerje të sulmeve në dy anije transportuese të naftës, derisa Irani ka rrëzuar një dron mbikëqyrës amerikan.

Teherani ka mohuar përgjegjësinë për sulmet në tanke dhe ka thënë se droni i Shteteve të Bashkuara ka qenë duke fluturuar në hapësirën ajrore iraniane.

Traktatet për kontrollin e armëve, të cilat si Putin ashtu edhe Trump kanë kërcënuar se do t’i pezullojnë, do të jenë pjesë e diskutimeve mes të dy liderëve, është thënë në një dokument të Kremlinit.

Ushakov tha se liderët do të diskutojnë edhe për “stabilitetin strategjik dhe një varg konfliktesh rajonale”, duke përfshirë Sirinë, Venezuelën dhe Iranin.

Washingtoni në anën tjetër nuk ka konfirmuar datën e takimit.

“Nuk do të jetë një samit zyrtar, mirëpo pritet të jetë bisedë që do të fokusohet fillimisht në aspektet e sigurisë rajonale, duke përfshirë, Iranin, Ukrainën, Sirinë dhe Lindjen e Mesme,” tha një zyrtar i lartë i administratës amerikane.

Presidenti Trump është shprehur javën e kaluar se planifikon të takohet me Putinin në samitin e G20-ës në Japoni.