Trump: Izraeli nuk do ta sulmojë Iranin! Izraeli: U përmbajtëm, goditëm vetëm një radar!

Presidenti i Shteteve të Bashkuara, Donald Trump, u vu sot në një pozitë shumë të vështirë pas armëpushimit që publikoi ku ndonëse kishte biseduar me Kryeministrin izraelit, Benjamin Netanyahu, përmes telefonit dhe lajmëroi se Izraeli nuk do ta sulmojë Iranin e pilotët po kthehen, Teherani u sulmua.

Madje sipas autoriteteve izraelite ata ishin treguar të përmbajtur dhe kishin sulmuar vetëm një radas afër Teheranit.

“Izraeli nuk do ta sulmojë Iranin. Të gjithë aeroplanët do të kthehen në shtëpi, me një ‘përshëndetje krahu’ miqësore ndaj Iranit. Askush nuk do të lëndohet, armëpushimi është në fuqi! Faleminderit për vëmendjen tuaj!” bëri të ditur President Trump përmes rrjetit social Truth por izraelitët nuk iu bindën.

Zyra e kryeministrit izraelit Benjamin Netanyahu ka lëshuar një deklaratë duke konfirmuar se Izraeli kishte sulmuar një sistem radari pranë Teheranit në përgjigje të “shkeljeve iraniane” të armëpushimit, raporton BBC.

Në deklaratë thuhet se Irani qëlloi një raketë drejt Izraelit në orën 06:06 dhe dy të tjera në orën 10:25, pasi armëpushimi hyri në fuqi.

Zyra tha gjithashtu se Izraeli ishte “përmbajtur nga sulme të mëtejshme” pasi kryeministri izraelit foli me Presidentin e SHBA-së Donald Trump.

Gjatë bisedës, Trump “shprehu mirënjohje të madhe ndaj Izraelit” i cili kishte “arritur të gjitha objektivat e tij të kohës së luftës”, thuhet në deklaratën e Zyrës kryeministrit izraelit Benjamin Netanyahu duke përfunduar.

“Presidenti shprehu gjithashtu besim në stabilitetin e armëpushimit!”

Ndërkohë Axios raporton se Netanyahu i tha Trump se nuk mund ta anulonte sulmin dhe se ishte i nevojshëm sepse Irani kishte shkelur armëpushimin, por premtoi se sulmi do të zvogëlohej ndjeshëm dhe do të goditej vetëm një objektiv.

Mediat iraniane raportuan se sulmet goditën Babolsarin, një qytet bregdetar në Detin Kaspik në veri të Teheranit.