Trump-Johnson bisedojnë për tregtinë e lirë dhe Iranin
Presidenti i Shteteve të Bashkuara, Donald Trump ka uruar Boris Johnsonin për marrjen e detyrës si kryeministër i ri i Britanisë së Madhe ndërsa kanë biseduar edhe për tensionet me Iranin dhe marrëveshjen për tregti të lirë, raporton RFE.
Dy udhëheqësit, përmes telefonit kanë biseduar për kapjen e cisternës britanike nga Irani në Ngushticën e Hormuzit, si dhe për nevojën që Washingtoni dhe Londra të punojnë së bashku për këtë çështje.
Ndryshe, tensionet ndërmjet Iranit dhe Britanisë janë përshkallëzuar nga 4 Korriku momenti kur Forcat Detare britanike kapën një cisternë iraniane në Gjibraltar, dhe më pas Irani konfiskoi një cisternë të naftës së Britanisë më 19 korrik.
Cisterna britanike dhe ekipi i saj gjenden në portin Bandar Abbas dhe janë ndaluar nën dyshimin se kanë shkelur rregullat ndërkombëtare detare. Britania dhe pronari i anijes nga ana e tyre mohojnë këto pretendime.
Ndërkaq, Presidenti Trump tha se Washingtoni dhe Londra tashmë kanë nisur të punojnë drejt një marrëveshjeje për tregti të lirë ndërmjet dy vendeve.
Boris Johnson u bë kryeministër i Britanisë pasi paraardhësja e tij, Theresa May nuk arriti që të nxjerr vendin nga Bashkimi Evropian, pasi Parlamenti britanik refuzoi marrëveshjen e arritur me Brukselin. Ndërkohë Boris Johnson është zotuar se Britania do të dalë nga BE më 31 tetor me ose pa marrëveshje.
