Trump kërcënon me sulme të tjera Venezuelën, pasardhësja e Maduros e fton për “bashkëpunim”

Bashkimi Evropian pasi dënoi arrestimin e liderit venezuelian Nicolás Maduro nga SHBA vazhdon me deklaratat luftënxitëse se mbështet të drejtën e Venezuelës për vetëvendosje, por ushtruesja e detyrës së Presidentit të Venezuelës, Delcy Rodríguez, sot është më e kthjellët dhe nuk merret më as me marrëzira evropiane dhe as ato kineze që i thonë Presidentit amerikan Trump “liro menjëherë Maduron”, por kërcënimet e Presidentit Trump i mori seriozisht dhe e fton për bashkëpunim.

Pasardhësja e Maduros ndryshon mendje
Udhëheqësja e përkohshme e Venezuelës, Delcy Rodríguez, e cila mori detyrën si presidente në detyrë mbrëmë, u ka bërë thirrje Shteteve të Bashkuara të bashkëpunojnë. Ajo e bëri këtë pasi bastisjet amerikane në Caracas gjatë fundjavës çuan në arrestimin e Nicolás Maduros.

Rodríguez, e cila më parë i drejtohej me një ton të ashpër Washingtonit, tani po flet për nevojën për “marrëdhënie të bazuara në respekt të ndërsjellë”, gjë që po interpretohet si një kthesë nga mesazhet e mëparshme, raporton Agjencia e lajmeve Associated Press.

“Ne i bëjmë thirrje qeverisë amerikane të punojë me ne në një agjendë bashkëpunuese të fokusuar në zhvillimin e përbashkët, brenda kuadrit të së drejtës ndërkombëtare, për të forcuar bashkëjetesën e qëndrueshme të komuniteteve,” shprehet Rodríguez përmes rrjetit social Instagram.

Ky ndryshim kursi i pasardhëses së Maduros vjen pas paralajmërimit të Presidentit amerikan Donald Trump, i cili duke folur në Air Force One, e bëri të qartë se Rodríguez mund të paguante një çmim shumë të lartë nëse nuk do t’u bindej kërkesave të SHBA-së dhe se veprimi i ri ushtarak ishte ende një opsion. “Nëse ai nuk e bën këtë, ndoshta do të përballet me një situatë më të keqe se Maduro,” tha Donald Trump para gazetarëve.

Nafta dhe Droga

Nëse Venezuela nuk bashkëpunon me përpjekjet e SHBA-së për të hapur industrinë e saj të naftës dhe për të goditur trafikun e drogës, Trump e tha qartë se mund të urdhërojë një sulm tjetër

Komentet e Trump erdhën në prag të paraqitjes së planifikuar të Maduros sot para një gjyqtari federal në New York.

Maduro u arrestua gjatë një operacioni ushtarak në Carakas të shtunën që ka ngjallur shqetësim ndërkombëtar dhe e ka zhytur Venezuelën në pasiguri. Zyrtarët e administratës Trump e kanë cilësuar kapjen e tij si një operacion të zbatimit të ligjit për ta mbajtur përgjegjës për akuzat penale të ngritura në vitin 2020, të cilat e akuzojnë atë për komplot për të kryer narko-terrorizëm.

Por vetë Trump tha se kishte arsye të tjera pas sulmit, duke thënë se sulmi u nxit pjesërisht nga një fluks emigrantësh venezuelianë në Shtetet e Bashkuara dhe vendimi i vendit për të shtetëzuar interesat amerikane të naftës.

“Ne po marrim mbrapsht atë që vodhën,” tha ai mbrëmë Air Force One ndërsa kthehej në Washington nga Florida. “Ne jemi në krye. Kompanitë e naftës do të kthehen në Venezuelë dhe do të rindërtojnë industrinë e naftës së vendit,” tha Trump. “Ata do të shpenzojnë miliarda dollarë dhe do ta nxjerrin naftën nga vendi”, tha ai.

BE dhe Kinezët merren me kinezërira

Pas arrestimit të Nicolás Maduro, BE vazhdon dhe këmbëngul në të drejtën e popullit të Venezuelës për vetëvendosje. “E drejta e popullit venezuelian për të vendosur për të ardhmen e vet duhet të respektohet,” shprehet Përfaqësuesja e Lartë e BE-së për Politikë të Jashtme dhe Siguri, Kaja Kallas përmes rrjetit social X, deklaratë e cila u tha se mbështetet nga të gjitha shtetet anëtare të Bashkimit Evropian përveç Hungarisë.

Shefja e diplomacisë evropiane përsëriti thirrjen për respektimin e së drejtës ndërkombëtare ndërsa theksoi rëndësinë e luftimit të krimit të organizuar ndërkombëtar dhe trafikimit të drogës, por në të njëjtën kohë se këto sfida duhet të adresohen përmes bashkëpunimit të qëndrueshëm me respekt të plotë për integritetin dhe sovranitetin territorial.

Respektimi i të drejtave të njeriut është gjithashtu me rëndësi thelbësore gjatë kësaj kohe kritike, për Kaja Kallas. “Të gjithë të burgosurit politikë që ndodhen aktualisht në Venezuelë duhet të lirohen pa kushte.” Shtetet anëtare të BE-së po punojnë ngushtë së bashku për të garantuar sigurinë e qytetarëve të BE-së, përfshirë ata që janë të ndaluar ilegalisht në Venezuelë, thotë BE.

Me të njejtën gjuhë fletë dhe Kina me një dallim të vetëm, atë që nuk mund ta bënte shefja e diplomacisë evropiane e bëri Presidenti kinez Xi Jinping, kërkoi lirimin e menjëhershëm të Maduros.

Bota ishte në një periudhë “jostabiliteti dhe ndryshimi” tha Xi Jinping duke paralajmëruar se “veprimet unilaterale dhe të dhunshme dëmtojnë seriozisht rendin ndërkombëtar,” raportoi televizioni shtetëror CCTV.

Pa përmendur drejtpërdrejt Shtetet e Bashkuara ose Venezuelën, Xi tha se “të gjitha vendet duhet të respektojnë rrugët e zhvillimit që popujt e vendeve të tjera kanë zgjedhur në mënyrë të pavarur”, raporton CCTV duke vazhduar me deklaratën e liderit kinez se vendet duhet “t’i përmbahen ligjit ndërkombëtar dhe qëllimeve dhe parimeve të Kartës së Kombeve të Bashkuara, fuqitë e mëdha, në veçanti, duhet të marrin drejtimin në këtë”.

Xi pas takimit me kryeministrin irlandez Michael Martin në Sallën e Madhe të Popullit në Pekin, si një aleat i hershëm i Venezuelës i bëri thirrje Shteteve të Bashkuara që të lirojnë “menjëherë” Presidentin Venezuelian Nicolás Maduro dhe gruan e tij, të cilët janë në paraburgim nga SHBA-të, duke i shtuar deklaratës së mëparshme të Pekinit zrtar se ishin “thellësisht të tronditur dhe dënojnë fuqimisht përdorimin e hapur të forcës nga SHBA-të kundër një shteti sovran”.