Trump-Kim Jong-un/ Çarmatimi bërthamor, Presidenti i SHBA: S’ka kthim prapa…

Presidenti i SHBA dhe udhëheqësi i Koresë së Veriut filluan Samitin e tyre të dytë në Vietnam.

Në ditën e parë udhëheqësit zhvilluan një bisedë kokë më kokë që zgjati rreth 20 minuta dhe më pas u ulën për darkë. Ndërkaq, sot pritet të diskutojnë një plan të detajuar për çarmatimin bërthamor të gadishullit Korean.

Presidenti Donald Trump tha në një mesazh Twitter se ai dhe Kim Jong-un “do të përpiqen shumë për të arritur diçka për çarmatimin bërthamor dhe për ta bërë Korenë e Veriut një superfuqi ekonomike”.

Ndërkaq sot delegacionet e dy vendeve pritet të diskutojnë një plan për çarmatimin bërthamor të gadishullit Korean. Në lidhje me këtë çështje ka pasur pak përparim që nga takimi i parë Trump-Kim në Singapor vitin e kaluar.

Presidenti Trump u tha gazetarëve se ai mendon se bisedimet do të jenë të suksesshme dhe nuk do të ketë kthim prapa për çarmatimin bërthamor.

I pyetur nëse do të shpallë formalisht përfundimin e luftës koreane, ai tha vetëm: “Do ta shohim”.

Në këto bisedime, Presidenti Trump shoqërohet nga Sekretari i Shtetit, Mike Pompeo dhe nga shefi në detyrë i kabinetit i Shtëpisë së Bardhë, Mick Mulvaney.