Trump: Raketat për sistemet Patriot janë tashmë në rrugë drejt Ukrainës

Raketat për sistemet e mbrojtjes ajrore Patriot të destinuara për Ukrainën janë tashmë në rrugë, tha Presidenti i SHBA-së Donald Trump, raporton  Kyiv Indepedent.

“Ato tashmë po dërgohen,” u tha Trump gazetarëve në bazën ushatarke Joint Base Andrews në Maryland, kur u pyet për dërgesën e raketave Patriot dhe pajisjeve të tjera. “Ato sillen nga Gjermania dhe më pas Gjermania rimbush stokun. Dhe në të gjitha rastet, Shtetet e Bashkuara paguhen plotësisht.”

Ky njoftim vjen në një kohë kur Ukraina po u kërkon aleatëve të saj, veçanërisht SHBA-së, sisteme shtesë të mbrojtjes ajrore për shkak të sulmeve në rritje ruse në qytetet ukrainase.

Një zëdhënës i qeverisë gjermane tha se aleatët evropianë janë në bisedime për të dërguar më shumë se tre sisteme Patriot në Ukrainë.

Marrëveshja e Re e Perëndimit

Trump shpjegoi se dërgesat ishin pjesë e një marrëveshjeje të re në të cilën anëtarët e NATO-s dhe Bashkimit Evropian blejnë sisteme armësh të prodhuara në SHBA, dërgojnë disa në Ukrainë dhe më pas i shkëmbejnë ato përmes një marrëveshjeje me Washingtonin. “Ne gjithmonë i marrim paratë tona mbrapsht, plotësisht”, shtoi Trump. “Në disa raste, vendet e Bashkimit Evropian na i kthejnë paratë direkt.”

Dërgesat e reja të armëve vijnë vetëm dy ditë pasi Trump lëshoi një ultimatum ndaj Moskës, duke paralajmëruar se SHBA-të do të vendosnin tarifa “të rënda” nëse Rusia nuk binte dakord për një marrëveshje paqeje brenda 50 ditëve për t’i dhënë fund luftës në Ukrainë.

Kremlini më parë i ka quajtur tarifat e propozuara “serioze”, duke thënë se Moskës i duhet kohë për të analizuar mesazhin e Washingtonit.

Presidenti amerikan gjithashtu vuri në dukje se nuk ka folur me Presidentin rus Vladimir Putin që kur SHBA-të vendosën sanksione të reja ndaj Rusisë më 14 korrik.

Komentet e Trump pasqyrojnë zhgënjimin në rritje me atë që ai e quan refuzim të Rusisë për t’u angazhuar seriozisht në bisedimet e paqes. Ai më parë ka pohuar se mund ta përfundojë luftën “brenda 24 orëve” dhe është distancuar përsëri nga konflikti, duke thënë: “Nuk ishte lufta ime. Ishte lufta e ish-Presidentit amerikan Joe Biden. Po përpiqem t’ju nxjerr nga kjo.”

“Jam i zhgënjyer nga Presidenti Putin,” shtoi Trump. “Mendova se do të kishim një marrëveshje dy muaj më parë, por nuk duket se po ndodh.”